Kryeministri Rama ka dhënë një shifër të numrit të turistëve në Shqipërinë komuniste dhe se ç’lloj ishin ata.
Duke folur në takimin e 70-të i Komisionit për Europën i Organizatës Botërore të Turizmit që po mbahet në Tiranë, ai përshkroi të djeshmen e izolimit shqiptar, veçimit nga bota.
“Ne kemi njohur një periudhë të historisë në të cilën kemi qenë tërësisht të ndarë e të veçuar e të izoluar nga të gjithë ju, nga ju që keni ardhur nga Perëndimi, por edhe nga ju që keni ardhur nga lindja. Sigurisht për ju qe vini nga lindja mund ta kuptoni më mirë ndoshta gjithçka qe ne kemi kaluar, megjithatë jam i sigurt, ajo që kemi kaluar ne është përtej imagjinatës të izolimit që kemi përjetuar ne dhe të brutalitetit që kemi hasur në këtë vend.
Përpara ose më saktë deri përpara tre dhjetëvjeçarësh, ne kemi patur vetëm pesë mijë turistë dhe nuk kanë qenë pesë mijë turistë të zakonshëm, por kanë qenë pesë mijë turistë marksistë-leninistë, historiku i të cilëve ishte parë me imtësi nga autoritetet e atëhershme, të cilët vinin nga partitë e majta ekstreme të të gjithë botës dhe kishin mundësinë qe të hynin në Shqipëri, e cila në atë kohë ishte Koreja e Veriut të Europës”, tha Rama.
Më tej, ai përmendi rruajtjen e detyrueshme të mjekrës apo shkurtimin e flokëve për ta, duke theksuar dhe se vetë dishempujt e komunizmit po të vinin në Shqipëri do t’i nënshtroheshin kësaj mase absurde.
“Ata kalonin doganën në aeroportin e Rinasit, ku kaluat shumica prej jush besoj dhe menjëherë duhet të kalonin tek berberi në rast se kishin mjekër ose në rast se kishin meshkujt flokë të gjata sepse mjekra dhe flokët e gjata për meshkujt nuk lejoheshin.
Pra edhe Karl Marksi i bie apo Engels, Lenini nuk do të kishin patur mundësi të hynin në Shqipëri pa kaluar nga berberi në aeroport që t’u hiqte mjekrën apo flokët e gjata, sipas rastit. Pra mendoni sa i thellë ka qenë izolimi dhe sa e fortë ka qenë ajo ortodoksia marksiste-leniniste, të cilën ne na është dashur ta përjetojmë”, tha Rama. /tesheshi.com/
