Në një ankand në Shtetet e Bashkuara, një iPhone i gjeneratës së parë nga viti 2007 u shit për 63,000 dollarë.
Modelet e vjetra të telefonave celularë kanë një vlerë koleksioniste në rritje, ndaj ato shiten shpesh në ankande për shifra astronomike kohët e fundit.
iPhone origjinal kushtonte 599 dollarë në 2007, kështu që shitësi në ankandin, i cili përfundoi të dielën, më 19 shkurt 2023, arriti më shumë se 100 herë vlerën e çmimit origjinal të modelit.
Gjenerata e parë e telefonit inteligjent të Apple kishte një ekran 3.5 inç, një kamerë 2 megapiksel, aftësi për t’u lidhur me internetin dhe për të hyrë në iTunes dhe ai vinte në dy variante me një kapacitet memorie prej 2 dhe 4 gigabajt. iPhone i parë për lidhje interneti përdorte 2G, dhe mund të lidhej vetëm me rrjetin e kompanisë amerikane të telekomunikacionit AT&T.
Telefoni u ofrua në ankand në një kuti të pahapur, dhe çmimi fillestar ishte 2500 dollarë. Shtëpia e ankandeve LCG Auctions ka pranuar gjithsej 27 oferta dhe në fund ka raportuar se fitues i ankandit ka qenë një person i paidentifikuar nga SHBA.
E njëjta shtëpi ankandi shiti tashmë një iPhone të pahapur në tetor 2022, i cili në atë kohë arrinte një çmim prej 39 mijë dollarësh, shkruan CNN.
iPhone i Apple ka ndryshuar mënyrën se si miliarda njerëz në mbarë botën komunikojnë, bëjnë pagesa, bëjnë biznes, bëjnë foto dhe madje edhe mënyrën se si zgjohen në mëngjes. Popullarizimi i iPhone solli një ndryshim të madh teknologjik, duke shkatërruar prodhimin dhe shitjen e videokamerave, MP3 playerëve dhe telefonave rrotullues dhe duke hapur hapësirë për industri të reja. /tesheshi.com/
