Se në Maqedoni liria e shprehjes është vetëm një e drejtë në letër dhe jo e zbatuar, dëshmon protesta e sotshme e Shoqatës së Gazetarëve. Kjo shoqatë, zgjodhi të shënojë ditën e Lirisë së Medias duke shkuar para burgut të “Shuto Orizares”, sepse sipas tyre, kjo është simbolika më e mirë për mungesën e lirisë së mediave në Maqedoni. Kështu u shpreh kryetari i SHGM-së Naser Selmani, në konferencën për media, me rastin e 3 majit – ditës ndërkombëtare të Lirisë së Mediave.
Ai tha se arsyeja pse vendosën që këtë ditë të shënojnë pikërisht para burgut, është se aty qëndron i dënuar gazetari Zoran Bozhinovski, i cili sipas Selmanit, ndodhet aty vetëm për shkak të akuzave të pabaza.
“Faji i vetëm i tij është guximi për të shkruar për fytyrën e shëmtuar të pushtetit, për gënjeshtrat, krimin dhe jomoralitetin e tij. Ata që Maqedoninë e shndërruan në laborator të përgjimit masiv, nuk mund të akuzojnë të tjerët për spiunim. Të amnistuarit për krime të rënda nuk mund të drejtojnë gishtin kundër të tjerëve për ndërmarrje kriminale. Me çfarë fytyre ky pushtet mund të akuzojë një gazetar për shantazh, kur i vetmi mjet i qeverisjes së tyre është shantazhi dhe presioni.”, ka deklaruar Naser Selmani, kryetar i SHGM-së. /tesheshi.com/
