Arben Ahmetaj ka bërë daljen e radhës në median opozitare Syri TV, por duke qenë, si herët e tjera, tejet konfuz.
Me fraza të palidhura logjikisht, plot aludime e nëntekste, paqartësia e tij pothuajse zhbën çdo interes për ta ndjekur.
Dhe siç ka shkruar një komentator politik, “akuzat e tij kanë vlerë nëse do bëhet bashkëpunëtor i drejtësisë dhe do t’i deponojë përpara një hetuesi të BKH dhe prokurori të SPAK-ut”.
Ndaj, ajo që po lexohet te daljet e tij mediatike, është më shumë përpjekja për të marrë azil aty ku ndodhet, në Zvicër. Kjo e ka zhvlerësuar tërësisht në ato që thotë, edhe nga fakti që nuk thotë asgjë.
Madje dhe kur ishte aktor politik, veç një perceptimi si i korruptuar, Ahmetaj dallohej dhe për varfërinë ligjërimore edhe në gjuhën teknokratike. Si shembull, drejtoi ekonominë, financat e turizmit, por kurrë nuk bindte, në ligjërim, se ishte i denjë për to.
Fjala vjen, krahasimisht me Erion Braçen, një ndër kritikët e ashpër të tij, edhe si njeriu që i zuri vendin si zv/kryeministër, Arben Ahmetaj ngjante tejet i vogël në formim, përcjellë nga një ligjërim që kurrë nuk thoshte diçka të vyer. /tesheshi.com/
