Profesor Shezai Rrokaj, është një nga tre kandidatët për kryetar të LSI-së në zgjedhjet që kjo parti do të zhvillojë më 6 nëntor.
Përveç Rrokajt, përballë Ilir Metës garon edhe deputeti i LSI-së, Përparim Spahiu.
Gjuhtari Rrokaj, që është dhe kreu i LSI-së për Tiranën, gjatë një takimi me të rinjtë ka thënë hapur atë që perceptohet nga të gjithë por që nuk thuhet; se nuk është në garë për të fituar përballë Metës, por…për të shpalosur mendimet.
“Kryetari i partisë, Ilir Meta është projektues, nuk e ka marrë si trofe nga të tjerët LSI-në. Është një vlerë e jashtëzakonshme. LSI është pasuri kombëtare dhe është pasuri e të gjithë neve. Dhe në këtë kuptim të gjithë duhet të shtojmë nga pak për ta bërë këtë projekt, këtë parti, një forcë të madhe. Kështu që unë nuk jam në garë me Ilir Metën, jam në garë me mendimet dhe me alternativat që do të shpalos dhe në fund të ditës do ta nxjerrin fituese LSI-në. Modelet e përfaqësimit për të rritur cilësinë e drejtimit. Sepse vetëm duke ofruar alternativa ne e bëjmë partinë më të fortë, më të shëndoshë, me të ardhme më të siguritë për qytetarët. Në qoftë se unë do të arrijë që të jem i kënaqur me mendimet që do të shpalos, unë garën e kam të fituar”, tha profesor Shezai Rrokaj.
/tesheshi.com/
