Ish-ylli ukrainas i futbollit Andriy Shevchenko është bërë këshilltar i jashtëm i presidentit ukrainas Volodymyr Zelensky, raportojnë mediat ukrainase.
Presidenti Zelensky publikoi një dekret për emërimin e Shevchenkos si këshilltar i jashtëm, por nga dekreti i shkurtër nuk mund të kuptohej se cilat do të ishin detyrat e tij.
Shevchenko fitoi një njohje të madhe ndërkombëtare si lojtar i Milanit e më pas Chelsea-t. Ai fitoi Champions League me Milanin në vitin 2003 dhe një vit më vonë fitoi Topin e Artë, çmimin më prestigjioz të futbollit.
Ish-futbollisti ka luajtur 111 herë për kombëtaren dhe ka shënuar 48 gola, ndërsa para se të largohej jashtë vendit ka luajtur për Dinamo e Kievit. Ai konsiderohet si një nga futbollistët më të mirë ukrainas të të gjitha kohërave.
Pas karrierës si lojtar, të cilën e përfundoi në vitin 2012, Shevchenko fillimisht u ul në stolin e kombëtares së Ukrainës si ndihmës trajner dhe katër vjet më vonë u bë trajner dhe udhëhoqi tipin e përzgjedhur të Ukrainës në çerekfinalet e Europianit 2021, që është arritja më e madhe e tij deri tani. Në sezonin 2021/22. ai drejtoi Genova-n në Seria A.
Vitin e kaluar, presidenti ukrainas Zelensky emëroi Shevchenkon në krye të Fondacionit për Rindërtim dhe Zhvillim të Ukrainës. /tesheshi.com/
