Andriy Shevchenko, i kujtuar ndër sportdashësit si golashënuesi i Milanit, e po ashtu si një sulmues i anglezëve të Çelsit, do të jetë në dy vitet e ardhshme trajneri i skuadrës përfaqësuese të Ukrainës.
Ai zëvendëson në këtë detyrë Mykhaylo Fomenko-n, pas një paraqitjeje aspak të mirë në Euro 2016, ku Ukraina u largua pa shënuar madje asnjë gol.
Ukrainasit dukeshin se ishin në formë para Europianit, duke mundur në miqësore si Rumaninë dhe Shqipërinë, por gjatë Kampionatit Europian i humbën të tre takimet në grupin C, duke përfunduar të fundit, pa asnjë pikë.
Shevchenko qe ndihmësi i Fomenko-s në këto takime, për t’i zënë tanimë vendin. Ai nuk ka drejtuar më parë një ekip, teksa është tërhequr nga karriera futbollistike katër vite më parë.
Ish-sulmuesi ukrainas ka luajtur në 111 takime për vendin e tij, duke shënuar 48 gola, më shumë se çdokush tjetër.
Kontrata e tij për drejtimin e kombëtares së Ukrainës është dyvjeçare, me një mundësi rinovimi për dy vite të tjera. Detyra e tij parësore është kualifikimi i Ukrainës për në botërorin e 2018-tës. Pjesë e ndihmësve të tij do të jetë dhe Mauro Tassotti, ish-mbrojtësi i Milanit, e po ashtu ndihmëstrajner ndër vite me të njëjtin ekip. /tesheshi.com/
