Një pedagog i “Fan Nolit”, universitetit të Korçës, ka rënë në prangat e policisë pas një hetimi nga SPAK, pasi akuzohet se merrte para nga studentët për provimet.
Fjala është për Alket Dinon. Bashkë me të, sipas njoftimit zyrtar, është arrestuar dhe një sekser, pikërisht shtetasi Xhevi Dervishi.
“Specialistët për Hetimin kundër Korrupsionit në Drejtorinë Vendore të Policisë Korçë, nën drejtimin e SPAK, bënë arrestimin në flagrancë të shtetasve: A. D., 34 vjeç, banues në Korçë (me detyrë pedagog pranë Fakultetit të Shkencave të Natyrës dhe atyre Humane) dhe Xh. D., 35 vjeç (sekser) të dy banues në Korçë.
Shtetasit e mësipërm, janë kapur në afërsi të këtij Fakulteti me një sasi prej 300 eurosh dhe 50.000 lekë, të cilat nga hetimet e kryera dyshohet se i kanë përfituar në mënyrë të kundërligjshme nga studentët, të cilat u sekuestruan në cilësinë e provës materiale.
Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë për veprat penale ‘Korrupsioni pasiv i personave që ushtrojnë funksione publike’, ‘Korrupsioni aktiv’ dhe ‘Ushtrimi i ndikimit të paligjshëm’”, njofton policia. /tesheshi.com/
