Kryeministri Rama nuk ia ka marrë për të madhe homologut të tij kosovar, Ramush Haradinaj, llojin e reagimit nervoz që ky i fundit pati një natë më parë ndaj tij, pas komenteve për Demarkacionin.
“Unë kam bindjen time, ai të vetën, nuk ka asnjë problem.Unë ashtu sikundër jam i drejtpërdrejtë kur flas, nuk e kam problem kur të tjerët janë të drejt për drejtë kur flasin. Nuk ka rëndësi fare, në fund fare se çfarë është thënë, rëndësi ka se çfarë do të bëhet. Unë uroj shumë që Ramushi do të bëjë gjënë e duhur dhe me kaq mbaron”, tha Rama gjatë një prononcimi për Top Channel.
Më tej, shefi i qeverisë shqiptare tha se shpresonte që ngërçi në politikën kosovare, të cilën ai ia adreson Ramushit, gjithnjë për Demarkacionin, të zgjidhej me marrëveshjen e fundit të nënshkruar mes Thaçit dhe kryeministrit malazez, Markoviç.
“Unë jam shpresëplotë që janë momentet e fundit të ngërçit dhe uroj shumë që shpresat të realizohet me një votë ratifikimi në Kuvend për ta çliruar përfundimisht Kosovën nga pengesa e tmerrshme e pamundësisë për të lëvizur lirisht qytetarët e saj. Por jo vetëm kaq, por edhe për të rivendosur shtetin në një pozicion të respektueshëm pasi kjo e demarkacionit i ka shkaktuar kosto shumë të mëdha shtetit të Kosvoës, në raport me komunitetin ndërkombëtar, dhe miqtë dhe partnerët që janë kontributorët kryesorë të lindjes së shtetit të Kosovës”, shtoi Rama. /tesheshi.com/
