Ashtu siç pritej, Komisioni Hetimor për çeshtjen CEZ ka degjeneruar sërish me fyerje dhe përplasje mes kryetarit Taulant Balla dhe ish-kryeministrit Sali Berisha, i thirrur nën cilësinë e dëshmitarit.
Kryetari i komisionit Balla ka pyetur Berishën për privatizimin e OSSH-së nga kompania çeke CEZ, si dhe dëmet në rrjet, që kapin vlerën e 414 milion eurosh. Ish-kryeministri i ka drejtuar një lumë fyerjesh Ballës, teksa bënte kërkime në I-pad-in e tij personal.
“Je i dënuar me vendim të formës së prerë për shpifje. Pusho! Ti nuk ke autoritet për të më pyetur mua sepse je shfpifës. Po shpif për të mbrojtur Ramën”, i është kundërpërgjigjur Berisha Ballës, ndërsa ky i fundit e pyeste për dëmet e shkaktuara nga CEZ. Sipas Ballës, Berisha kërkon të devijojë hetimin, duke mbajtur qëndrime të tilla.
Në debat u përfshi edhe Ritvan Bode, si anëtar i këtij komisioni. Ai akuzoi kryetarin Balla se nuk po i përmbahet ligjit për privatizimin dhe se po bën pyetje diskriminuese.
“Pyetjet tuaja të jashtëligjshme. Vlerën e humbjeve në rrjet do ta përcakojë një audit ndërkombëtar i pranuar nga dyja palët, pra nga mazhoranca dhe opozita. Ti nuk përcakton humbjen. Janë pyetje politike këto që po bën”, u shpreh Bode.
Javën e shkuar, Arben Ristani i dërgoi një letër të hapur Kuvendit se Taulant Balla është në konflikt interesi me ish-kryeministrin dhe se dëshmia e tij do të jepet vetëm nëse ai braktis postin e kreut të komisionit hetimor./tesheshi.com/
