Romeo Gurakuqi, ish-deputet i PD-së, ka ridenoncuar kolegun e tij partiak, ish-presidentin Nishani, si njeriu që tentoi, me anë të mashtrimit publik, të përlyente me aludime të rënda për implikim me ish-Sigurimin e Shtetit, atë dhe familjen e tij.
Pasi ka siguruar një dokument pastërtie, profesori i njohur i Historisë, njeriu që drejtoi PD-në e Shkodrës vitet e fundit, reagoi:
“Sapo jam njoftuar nga Autoriteti për Informim mbi Dosjet e ish-Sigurimit të Shtetit (AIDSSH), se dy kartelat në shifra të paraqitura nga ai individi që për fat të keq ka qenë President i vendit, nuk kanë të bëjnë as më mua, as me familjen time.
E gjithë mjegulla e hedhur në opinionin publik kundër personit tim dhe njerëzve të familjes sime nga ish – presidenti i Republikës dhe simahorët e prapësive të tij përbën një shpifje të mirëfilltë, një përpjekje për të më dëmtuar imazhin, shantazh kundër personit tim.
Rasti në fjalë është flagrant dhe përbën skandal të paprecedent në jetën publike të Shqipërisë së 30 viteve të fundit, që nuk mund të kalohet lehtë, jo vetëm nga unë, por shpresoj as nga organet e drejtesise dhe ligjit të Republikës së Shqipërisë.
Nga individi në fjalë, ish -president i Republikës, janë përdorur dy numra kartelash, emrat e dy oficerëve operative dhe dy pseudonime informatorësh të ish -Sigurimit të Shtetit, të cilët identifikohen lehtë në Berat dhe Lushnjë. E gjithë kjo maskaradë është stisur për të goditur një deputet të PDSH, familjen e tij, për të më frikësuar, për të mbytur fjalën e lirë dhe arsyetuar mbrapshtitë e goditjes së deputetëve opozitare ne bllok”, shkruam Gurakuqi.
Në fund, ai thekson se me Nishanin do e vijojë betejën në plannin gjyqësor.
“Me individin në fjalë do të vijoj betejën nëpërmjet drejtësisë shqiptare, e cila duke e dënuar aktin qe ai kreu, do të dënojë shpifjen si mjet për të kontrolluar politikën shqiptare dhe për të mashtruar opinionin publik”, përfundon ish-deputeti demokrat.
