Policia ka dhënë detaje mbi ngjarjen e ndodhur në Sarandë, ku disa persona u përfshinë në një sherr me armë, që shkaktoi 3 të plagosur.
Uniformat blu kanë marrë njoftimin nga një qytetar dhe me të shkuar në vendngjarje gjetën të plagosur tre persona, shtetasit Antonio Shyti, Besim Xhafa dhe Fisnik Musaj.
Antonio Shyti dhe Besim Xhafa janë transportuar për në spitalin e Tiranës, ndërsa Fisnik Musaj në Spitalin e Sarandës. Policia sqaron se ka patur një konflikt fizik mes disa personave dhe pas kësaj janë përdorur armët.
“Policia menjëherë ka shkuar në vendngjarje ku ka konstatuar shtetasit Antonio Shyti, Besim Xhafa, të dëmtuar në këmbë prej përdorimit të armëve të zjarrit të cilët janë transportuar për ndihmë mjekësore në Spitalin Rajonal të Tiranës si edhe shtetasin Fisnik Musaj, i cili ndodhet në Spitalin e Sarandës.
Nga hetimi paraprak ka rezultuar se shtetasit Antonio Shyti, Besim Xhafa, Renald Canaj, dhe A.Q., janë konfliktuar fizikisht me shtetasit Fisnik Musaj dhe D.M., ku gjatë konfliktit kanë përdorur armë zjarri ndaj njëri-tjetrit për motive të dobëta”, thuhet në njoftimin e policisë.
Në lidhje me këtë ngjarje, janë shoqëruar në komisariat 8 shtetas. Gjatë kontrollit të ushtruar në banesat e shtetasve A.Q, dhe Renald Canaj, policia ka konstatuar disa fishkekë armë zjarri pistoletë, lëndë narkotike Cannabis Sattiva, dhe disa telefona të markave të ndryshme.
Në momentin kur policia ka shkuar në vendngjarje shtetasit A.Q., Renald Canaj, dhe D.M., ishin larguar nga vendi i ngjarjes, por nga reagimi në kohë i policisë në bashkëpunim me shërbimet e policisë së DVP Fier, është bërë e mundur, kapja dhe ndalimi i shtetasit Renald Canaj.
Gjithashtu Policia ka bërë shpalljen në kërkim policor të shtetasve A.Q., dhe D.M./tesheshi.com/
