Republikani Al Schmidt, një komisioner në Filadelfia, qytet në Pensilvani, mbrojti integritetin e numërimit të votave në qytetin e tij pasi Donald Trump dhe ekipi i tij (përsëri) bënë deklarata të pabazuara mbi mashtrimet zgjedhore në këtë shtet.
Schmidt tha se qyteti duhet të mbetet i përqendruar në numërimin e fletëve të votimit të vlefshme para se të skadojë afati i verifikimit, një qëllim që nuk duhet të jetë i diskutueshëm.
“Unë kam parë gjërat më fantastike në mediat sociale, njerëzit bëjnë akuza krejtësisht qesharake që nuk kanë asnjë bazë”, tha Schmidt për CNN.
“Unë e kuptoj që shumë njerëz janë të lumtur për këto zgjedhje dhe shumë nuk janë,” shtoi Schmidt. “Njeriu nuk mund të kuptojë se sa të uritur janë njerëzit për të konsumuar gënjeshtra dhe për të konsumuar informacione që nuk janë të vërteta.”
Pasi u transmetua intervista e Schmidt, Trump akuzoi komisionerin për “përdorimin e tij tmerrësisht për të shpjeguar se sa të sinqerta ishin gjërat në Fake News Media (parulla e Trump – media e rreme – siç i quan të gjithë ata që nuk janë në favor të tij) mbi zgjedhjet në Filadelfia “.
“Ai nuk pranon të shikojë në malin e korrupsionit dhe të pandershmërisë. Ne fituam! ”, shkruajti Trump në një cicërimë.
Në realitet, Joe Biden aktualisht udhëheq Pensilvaninë me rreth 48,000 vota më shumë se Trump, dhe ekipi i presidentit ende nuk ka siguruar prova për të mbështetur pretendimet e mashtrimit të zgjedhjeve.
Edhe vetë ekipi zgjedhor i Donald Trump pranon se nuk kanë arritur të paraqesin ndonjë provë mashtrimi.
Duke dalë para një gjykatësi të Pensilvanisë dje, një nga avokatët e presidentit u pyet nëse po flisnin për një mashtrim të pretenduar që përfshinte 592 fletë votimi.
Avokati u përgjigj: “Me sa di unë për momentin, jo.” /tesheshi.com/
