Sekretari i NISMA-s, Bilal Sherifi kërkon largimin sa më të shpejtë të qeverisë PDK-LDK, pasi, sipas tij, është e ndërtuar në mosbesim e pabesi. Ai thotë se këto dy parti për vite të tëra akuzuan njëra tjetrën për të këqijat që i kanë ndodhur vendit.
Sherifi në një postim në Facebook shprehet se edhe pas tre vjetësh në qeverisje, këto parti nuk i ndalën akuzat ndaj njëra tjetrës. “Sikurse ato të mëparshmet, as qeverisja aktuale tre vjeçare mes tyre nuk arriti as t’i zbusë se lëre më t’i eliminojë kundërthëniet dhe akuzat që i kanë përcjellë këto dy parti që nga fillimi e deri më sot. Kjo gjë u pa sapo filloi të fryjë era e zgjedhjeve sepse bashkë me të u rikthyen edhe temat e vjetra si tradhtia dhe vrasjet. Kjo qeveri që nga formimi i saj më shumë ka funksionuar si një ‘Triumvirat” i PDK-LDK-LS-së, sesa si një qeveri unike. Këtë e dëshmon lufta e pandërprerë që kanë zhvilluar ‘partnerët’ e koalicionit kundër njëra tjetrës për t’i vendosur njerëzit e tyre në pozita të rëndësishme në ndërmarrjet publike si në PTK, RTK, si dhe në shumë pozita tjera të rëndësishme shtetërore si në doganë, administratë tatimore, borde të institucioneve të pavarura etj”, thotë Sherifi.
Sipas tij Isa Mustafa vetëm në aspektin formal është kryeministër i qeverisë ndërsa kryeministër real është vetëm për ministrat e LDK-së, pasi thotë se ministrat e PDK-së shef gjithnjë e kanë pasur dhe e kanë kryetarin partisë së tyre.
“Për ministrat e Listës Serbe nuk kemi as çka të flasim, ata në vazhdimësi kanë deklaruar hapur se kryeministër i tyre është kryeministri i Serbisë Akeksandër Vuçiqi. Objektiv i tyre ishte dhe vazhdon të jetë pengimi i shtetit të Kosovës dhe forcimi i shtetit të Serbisë brenda territorit të Kosovës, në veçanti në pjesën veriore të vendit”.
“Për këto dhe shumë arsye tjera, tani është koha që të gjithë ata deputetë, qoftë nga mazhoranca qoftë nga opozita, të cilët për çfarëdo arsye kanë qenë dhe janë kundër këtij koalicioni, përmes mocionit të mosbesimit ndaj qeverisë në Kuvendin e Republikës, t’i japin fund këtij modeli të qeverisjes me mosbesim dhe pabesi”, ka shkruar Sherifi.
Mustafa e Veseli nuk e kanë përjashtuar mundësinë e kalimit në zgjedhje të reja nëse dështon ratifikimi i Demarkacionit. /tesheshi.com/
