Sekretari i partisë opozitare, NISMA për Kosovën, Bilall Sherifi mendon se qeveria e udhëhequr nga PDK dhe LDK nuk i ka numrat për ratifikimin e Demarkacionit.
Sipas tij, tentimi për të jetësuar versionin aktual të marrëveshjes për shënjimin e kufirit me Malin e Zi, por edhe “Zajednicën”, dëmton rëndë të ardhmen e vendit.
Sherifi,në intervistën e dhënë për tesheshi.com flet edhe për fatin e qeverisë “Mustafa”, gjigantin metalurgjik “Trepça”, dhe për çështje të tjera…
Intervistoi: Blendi Gashi
Po e fillojmë intervistën me pyetjen për gjigantin metalurgjik “Trepça”. Kuvendi të premten do të hedh këtë projektligj në votim. Si e shihni ngutin e trajtimit të këtij projektligji? Vota e deputetëve të NISMA-s do të jetë pro apo kundër?
NISMA konsideron se qeveria e Kosovës, si për çdo interes të madh publik e nacional në kontinuitet po tregohet joserioze. Ky joseriozitet po tregohet edhe me ligjin për Trepçën. Trepça duhet të trajtohet si pasuri e veçantë e Kosovës dhe vetëm konform nenit 160 të Kushtetutës. Këtë e mbron NISMA, si në Kuvend apo kudo tjetër. Falimentimin e Trepçës me çdo kusht duhet parandaluar.
Projektligji tjetër që pritet të vijë së shpejti në Kuvend është ai për Demarkacionin. Sipas jush a do të ratifikohet kjo marrëveshje? Nëse ndodh një gjë e tillë a pritni që të rikthehen tensionet në vend?
Koalicioni po t’i kishte numrat, do ta votonin Demarkacionin. NISMA është e bindur se këtij versioni të Demarkacionit, Kuvendi i Kosovës duhet t’i thotë “Jo”, sepse vetëm ashtu hapen rrugët për një proces të ri. Çdo veprim i pa përgjegjshëm i qeverisë, krijon probleme politike që do të përkeqësonin edhe gjendjen e sigurisë në vend. Zhvillime të tilla nuk i duhen vendit.
Asociacioni është një tjetër temë e nxehtë. Nëse pas Demarkacionit, qeveria “Mustafa” tenton ta jetësojë “Zajednicën”, cili do jetë reagimi i NISMA-s?
Nuk duhet të humbet më kohë me këto dy tema. Të dyja kanë rënë dhe nuk kalojnë më. Për Demarkacionin shumica e qytetarëve dhe shumica e deputetëve të Kuvendit janë kundër këtij versioni, prandaj nuk kalon. Gjithashtu e njëjta vlen edhe për “Zajednicën”, të cilën si të tillë e ka rrëzuar Gjykata Kushtetuese. Kushdo që tenton jetësimin e këtyre dyjave bën gabim të rëndë që do ta dëmtojë rëndë të ardhmen e vendit.
Të kalojmë në një çështje tjetër: kryekuvendari Veseli, në një takim që zhvilloi me studentët tha se “UÇK-ja është formuar në Fakultetin Juridik”, deklaratë e cila ngjalli reagime. Ç’mendim keni, ku është themeluar UÇK-ja?
Tani, këto deklarime të herëpashershme që kanë të bëjnë me themelimin UÇK-së kanë filluar të marrin edhe trajta komike. Që nga përfundimi i luftës, janë dëgjuar tregime nga më të ndryshmet se kur ku dhe nga kush u themelua UÇK-ja, shumë nga të cilat janë bërë për konsum shpeshherë ditor dhe mbi të gjitha për interesa personale, prandaj, deklaratat e tilla i konsideroj si joserioze. Historia e themelimit të UÇK-së nuk mund të sqarohet me një intervistë. Ajo që mund të them tani është se themelimi i saj ka qenë një proces i gjatë dhe jo një akt sikur përpiqen disa ta paraqesin.
A prisni që zgjedhjet të mbahen sivjet apo vitin e ardhshëm? Kurdo që mbahen, NISMA më kë do dëshironte do lidhte koalicion qeverisës: me PDK-në apo me Vetëvendosje-n?
Kjo qeveri e ka humbur besueshmërinë e qytetarëve të Kosovës. Anketat e mbajtura nga organizatat ndërkombëtare, si p.sh nga UNDP ku besueshmëria e qeverisë ka rënë në 15 %, janë dëshmi se vendi është dashur këtë vit të shkojë në zgjedhje të parakohshme. Kjo qeveri nuk do të mund ta çojë mandatin deri në fund, mbetet të shihet se kur do ta pranojnë këtë fakt. Ju e dini që NISMA është në koalicion parazgjedhor me AAK-në, prandaj vendimin se me kë do të bëjmë koalicion pas zgjedhjeve do merret së bashku dhe jo tani, por pas zgjedhjeve.
Për fund, ushtria e Kosovës, heqja e vizave, a pritet të realizohen sivjet apo do mbesin premtime të parealizuara të qeverisë aktuale?
Edhe këto premtime sikur shumë premtime tjera të kësaj mazhorance, për fatin e keq të këtij vendi, do të mbesin pa u realizuar. Kjo mazhorancë nuk është krijuar për të mirën e vendit prandaj është iluzore të priten të mira nga ta. /tesheshi.com/
