Ish-deputeti demokrat Sherefedin Shehu përmes një komenti në rrjetet sociale shkruan se SHBA e bojkotoi zgjedhjen e Gramoz Ruçit në krye të Kuvendit, ndërsa PD dhe Lulzim Basha nuk bënë opozitë, por thjesht retorikë fjalësh.
Shehu akuzon Bashën se bëri një teatër të shëmtuar, ku nga një anë iu bashkua protestës së ish-të përndjekurve politik, dhe nga ana tjetër, nuk mbajti dot votat e deputetëve të tij pro zgjedhjes së Gramoz Ruçit. Dhe në këtë kuadër, Sheferedin Shehu mendon se pakti Rama- Basha vijon ende të jetë në veprim.
“PD e ka kundërshtuar publikisht zgjedhjen e Ruçit si kryetar i Kuvendit madje edhe e ka akuzuar se i ka “duart me gjak”, ndërsa dje mori pjesë në votimin e tij dhe i ka dhënë edhe 3 vota.
Kështu ne nuk bëjmë opozitë por retorikë. Dhe kjo e bën cinike pjesëmarrjen e Bashës në protestën e të përndjekurve pas zgjedhjes së Ruçit.
Me sa duket marrëveshja Rama-Basha është në veprim. Këtë e konfirmoi vetë Rama, e cili e falëndëroni publikisht PD-në për pjesmarrjen në votimin e Ruçit, jo për 3 votat, sepse nuk kishte nevojë për ato. Prandaj në vend që të bëjmë sikur protestojmë më mirë të reflektojmë. Dhe reflektimi duhet të jetë shumë i thellë, sepse:
1. Po të kishim ligjin e lustracionit Ruçi nuk mund të emërohej Kryetar. PD ka folur shumë, por një ligj lustracioni sipas modelit të vendeve të tjera ish-komuniste nuk e bëri asnjëherë.
2. Në “demokracinë” tonë nuk bëhen zgjedhje por emërime. Kështu emërohen fillimisht kryetarët e partive, dhe më pas ata emërojnë kryetarët e bashkive, deputetët, Kryeministrin, Presidentin dhe Kryetarin e Kuvendit.
3. Po të kishte fituar PD-ja 71 deputetë, Ruçi nuk mund të emërohej Kryetar.
4. Po të mos kishte fituar PS-ja shumicën në Kuvend, përsëri Ruçi nuk mund të emërohej Kryetar.
5. Në Shqipërinë tonë nuk ekziston morali duke filluar nga kokat që ne i quajmë liderët e partive, të cilët shumicën e deputetëve, që i emërojnë i kanë krimenelë, adoleshentë, të pashkollë, të paaftë, servilë dhe spiunë.
Pra në demokracinë që ndërtuam të gjithë sëbashku nuk është ndonjë çudi që Ruçi u zgjodh Kryetar Kuvendi. Atëherë pse çuditemi dhe gjoja protestojmë sot?”, shkruan Sherefedin Shehu. /tesheshi.com/
