Drejtori i Përgjithshëm i Emergjencave Civile, Shemsi Prençi ka kërkuar që shërbimi zjarrfikës të paguhet nga ai që e merr.
Pas dhurimit të 600 fikëseve zjarri shpine dhe 100 uniformave zjarrduruese nga Gazsjellësi Trans Adriatik, Prençi tha se “në Evropë fatura financiare e shërbimit zjarrfikës paguhet nga ai që merr shërbimin, ndërsa në Shqipëri është falas”.
“Shërbimi Zjarrfikës paguan faturat e ujit, por shërbimin për fikjen e zjarreve e ofron falas. Ndaj kushdo që shkel rregullat në mos garantimin e sistemit mbrojtës ndaj zjarrit, duket të paguajë këtë shërbim”, tha Prençi.
Drejtori i Përgjithshëm i Emergjencave Civile tha se nga muaji qershor i këtij viti deri në ditën e sotme, pothuajse në të gjithë Shqipërinë, janë regjistruar mbi 900 vatra zjarri. Nga këto mbi 280 raste të zjarreve masive kanë qenë me rrezikshmëri për njerëzit.
Nuk dihet nëse deklarata e Prençit për pagesën mbi shërbimin zjarrfikës është thjesht një propozim, apo do të konkretizohet me ligj nga qeveria e re që nis punën në shtator. /tesheshi.com/
