Shërbimet sekrete italiane dhe Guardia Di Finanza kanë lëshuar alarmin se në Shqipëri po riorganizohet mafia e trafikut njerëzor, pas të dhënave të dyndjes së emigrantëve nga Siria.
Ministri i brendshëm i Italiasë, Angelino Alfano, i ka dërguar një letër homologut të tij shqiptar, Saimir Tahiri, ku ka parashtruar rrezikun e dyndjes së një “populli barkash” nëpër Adriatik drejt Italisë.
Ministri Alfano e argumenton alarmin e tij në të dhënat që vijnë nga shërbimet e specializuara të sigurisë mbi rrezikun e një eksodi të ri.
Një infromacion që vjen konfidencial është ngritja në mënyrë të heshtur në zonën e Vlorës e një grupi të rrezikshëm që mund të riaktivizohet në trafikun e klandestinëve drejt brigjeve puljeze.
Një informacion i shërbimit sekret italian që bazohet në të dhëna operative, thekson se në Vlorë janë blerë vetëm ditët e fundit 11 gomone të mëdha që mund të përdoren për trafik klandestinësh.
“Përgjithësisht prej heqjes së moratoriumit të skafeve, trafiku me gomone drejt Puljas ka funksionuar kryesisht për lëndë narkotike si heroinë dhe hashash, por ka të dhëna se blerjet e reja me motorrë të fuqishëm janë gati të përdoren për klandestinë”, thuhet në raport.
Gjatë mesit të viteve ’90-të, Vlora ishte mjaft e njohur për trafikun e qenieve njerëzore nga Lindja e Mesme, por më shumë ishin kinezë që shkonin drejt Italisë duke u transportuar nga mafia shqiptare. /tesheshi.com/
