Të paktën 130 civilë u vranë në operacionet ushtarake amerikane vitin e kaluar në Irak, Siri, Afganistan dhe Somali, sipas një raporti të Pentagonit, dhe ky numër është shumë më i ulët se sa ato që thonë grupet e vëzhgimit, raporton Reuters.
Operacionet e vitit të kaluar në Afganistan vranë 108 civilë, 22 në Siri dhe Irak dhe dy në Somali, sipas një raporti prej 20 faqesh për operacionet ushtarake në dispozicion të agjencisë britanike.
Pentagoni pretendon se nuk pati viktima civile në operacionet amerikane në Libi dhe Jemen.
Raporti vjetor për Kongresin nuk është publikuar ende, por ka të ngjarë të dalë në ditët në vijim.
Por dega amerikane e Amnesty International pretendon se Pentagoni vazhdon të zvogëlojë viktimat civile.
“Bazuar në vendet ku kemi kryer hetime të gjera, të hollësishme, ushtria amerikane vazhdon të zvogëlojë ndjeshëm numrin e civilëve të vrarë dhe të plagosur në sulmet e SHBA”, tha Daphne Eviatar i organizatës.
Grupi vëzhgues i Airwars vlerëson se vetëm në gjashtë muajt e parë të vitit të kaluar, koalicioni i udhëhequr nga SHBA në luftën kundër ISIL në Siri vrau midis 416 dhe 1.030 civilë.
Airwars, një organizatë me qendër në Londër, pretendon se të paktën 15 civilë janë vrarë në sulmet e SHBA në Somali.
Në raportin e saj, ushtria amerikane pranon se shifrat e saj ndryshojnë nga ato të organizatave joqeveritare dhe thekson se metodologjia dhe informacioni i përdorur mund të jenë të ndryshëm. /tesheshi.com/
