Shkencëtarët kinezë pretendojnë se koronavirusi kurrë nuk do mund të zhduket plotësisht, duke u bashkuar me një numër në rritje të ekspertëve ndërkombëtarë që thonë se virusi do të kthehet sezonalisht, siç dhe gripi.
Siç raporton Bloomberg, ata deklarojnë se nuk ka gjasa që koronavirusi të zhduket ashtu si u zhduk SARS “vëllai i tij i madh” 17 vjet më parë, pasi ai transmetohet midis njerëzve pa u shfaqur me të gjitha simptomat. Eshtë ky grup pacientësh asimptomatikë që e bën kontrollin e epidemisë shumë më të vështirë, thanë shkencëtarët kinezë në një konferencë në Pekin.
Në SARS, të infektuarit kishin simptoma të rënda. Pasi u karantinuan, sëmundja ndaloi të përhapet. Në të kundërt, gjithnjë e më shumë raste asimptomatike të koronavirusit vazhdojnë të ndodhin në Kinë, megjithëse epidemia është vënë nën kontroll.
“Kjo do të jetë një epidemi me të cilën do të jetojmë për një kohë shumë të gjatë dhe ka të ngjarë të shfaqet sezonalisht,” tha Jin Qi nga Akademia Kineze e Shkencave Mjekësore.
Konsensusi po shfaqet midis shkencëtarëve në të gjithë botën se do të jetë shumë e vështirë të shkatërrohet plotësisht virusi, megjithë masat e rrepta dhe karantinat në të gjithë botën që kanë kolapsuar ekonominë. Disa madje kërkojnë që virusi të përhapet në mënyrë të kontrolluar në mesin e popullatës më të re, në mënyrë që të fitojë “imunitetin e tufës”, e kjo në një kohë që një shtet si Suedia, nuk pranoi të fusë masa të rrepta dhe karantina.
Edhe eksperti amerikan Anthony Fauci thotë se koronavirusi ka të ngjarë të kthehet sezonalisht.
Shkencëtarët kinezë gjithashtu thonë se nuk ka prova që infektimi të ngadalësohet gjatë verës.
“Virusi është i ndjeshëm ndaj nxehtësisë, por vetëm kur ekspozohet në një temperaturë prej 56 gradë Celsius për më shumë se 30 minuta. Në nivel global, shanset për një popullatë të infektuar që do të ulet në mënyrë drastike gjatë verës janë shumë të pakta”, thotë Wang Guiqiang. shef i departamentit të sëmundjes infektive në Spitalin Universitar të Pekinit. /tesheshi.com/
