Këshilli i Bashkëpunimit të Gjirit (GÇ) njoftoi se udhëheqësi i Katarit u ftua në samitin e bllokut javën e ardhshme në një kohë përpjekjesh për të përmirësuar marrëdhëniet midis Dohas dhe aleancës së udhëhequr nga Arabia Saudite.
Emiri i Katarit, Sheik Tamim bin Hamad Al Thani mori një ftesë zyrtare nga Mbreti saudit Salman në një takim të gjashtë vendeve anëtare të GÇ më 5 janar në Arabinë Saudite, lëshuar nga Sekretari i Përgjithshëm i Këshillit Nayef Falah Al-Hajraf.
Eshtë e paqartë nëse Shejh Tamim, i cili ishte ftuar në samitin e fundit, por refuzoi dhe dërgoi kryeministrin e atëhershëm Abdullah bin Nasser bin Khalifa Al Thani, do të shkojë në samitin muajin tjetër.
Përveç Arabisë Saudite dhe Katarit, anëtarët e GÇ përfshijnë Bahreinin, Omanin, Kuvajtin dhe Emiratet e Bashkuara Arabe.
Sinjali i zbutjes së ndarjes
Arabia Saudite, Emiratet e Bashkuara Arabe, Bahreini dhe Egjipti ndërprenë lidhjet me Katarin në qershor 2017, duke akuzuar vendin për financimin e grupeve “terroriste” dhe se ishte shumë afër Iranit. Doha ka mohuar vazhdimisht akuzat, duke thënë se nuk ka “justifikim të ligjshëm” për ndërprerjen e lidhjeve.
Pas ndërprerjes së marrëdhënieve, të katër shtetet lëshuan një listë me 13 kërkesa kundër Katarit, përfshirë atë të mbylljes së Rrjetit të Medias Al Jazeera.
Katërshja, e udhëhequr nga sauditët, më pas detyroi shtetasit e Katarit që jetonin në këto vende t’i linin ato, mbyllën hapësirën ajrore për linjat ajrore të Katarit dhe bllokuan portet dhe kufijtë, duke lënë të ndara disa familje të përziera.
Pjesëmarrja e Sheik Tamimit në samit do të ishte një sinjal i zbutjes së ndarjeve.
Të mërkurën, kabineti i Arabisë Saudite njoftoi se “dëshiron një samit të suksesshëm për të përmirësuar veprimin e përbashkët dhe për të përmirësuar bashkëpunimin midis vendeve anëtare”, sipas një deklarate nga agjensia zyrtare Saudite SPA.
Inaugurimi i Biden
Kjo vjen pas komenteve të mëparshme nga ministri i Jashtëm saudit, Princi Faisal bin Farhan, i cili tha se zgjidhja e mosmarrëveshjes duhet të arrihet. Egjipti dhe Emiratet e Bashkuara Arabe që atëherë kanë theksuar gatishmërinë e tyre publike për negociata, megjithëse burimet diplomatike thonë se Emiratet nuk janë plotësisht të gatshme për kompromis.
Të dielën, ministrat e jashtëm të GÇ mbajtën një takim virtual për të diskutuar “bashkëpunimin” përpara takimit të Këshillit. Gjatë takimit, ministri i Jashtëm i Bahreinit Abdellatif al-Zayani shprehu besimin në “mundësinë saudite për të gjetur një zgjidhje për mosmarrëveshjen e Gjirit”.
Sipas një zyrtari të Gjirit të njohur me negociatat, nuk ka gjasa që samiti të japë një marrëveshje të hollësishme por mund të sjellë masa të ndërtimit të besimit, duke përfshirë mundësinë e hapjes së hapësirës ajrore.
Kjo vjen në prag të 20 janarit dhe inaugurimit të Presidentit të ri të SHBA Joe Biden, i cili do të mirëpriste një zgjidhje të krizës që ka minuar përpjekjet e SHBA për të shtypur kundërshtarin e saj të madh, Iranin. /tesheshi.com/
