Fakti që ndodh ta gjejë llafin dhe AK-ja për ngjarje të përgjakshme si ajo e të mërkurës mbrëma në Elbasan, me deklarimin se prej dy vitesh policia vetëm mbledh gëzhoja në vendet e krimit, do të thotë se tek Rendi vërtet diçka e rëndë po ndodh.
Por nga ana tjetër i bihet në qafë kësaj qeverie e këtij ministri, Tahirit pra, nëse jua faturon atyre gjithë ç’po ndodh. Sepse Tahiri ka të drejtë kur të tilla ngjarje i konsideron si pjella të një drejtësie të degraduar në vite nga korrupsioni, por dhe të akumulimit ndër vite të sa e sa mbrapshtive, që vjen një ditë dhe shpërthejnë.
Por ja që kjo qeveri e ky ministër po i mbushin tre vjet në krye të vendit; dhe kjo padyshim që i ngarkon me jo pak përgjegjësi.
Të jemi më konkret: strukturat e Rendit në Elbasan, kanë qenë të njohura me këtë sagë 10-vjeçare vrasjesh? Sigurisht që po. A kanë bërë ato përpjekje përgjatë tre viteve – meqë policia është kthyer në detyrë në emër të Rilindjes – për t’i hyrë me themeli deri në asgjësimin e saj?
A është bashkëpunuar me strukturat e shërbimeve inteligjente për të mbajtur nën vëzhgim të gjitha lëvizjet e pjesëtarëve të të dy fiseve dhe, në bashkëpunim me instanca hetuese, të mund ta fusnin në rreth si problematikë të mprehtë rendi për qytetin deri në shuarjen përfundimtare.
A kishte ndonjë përqindje shansi që kjo sage egër vrasjesh të ndërsjellta të evitohej pikërisht nga një punë operative profesionale, e jo duke hequr qafe njëri-tjetrin?
Vështirë të besohet se po, ekzistonte një shans i tillë. Vështirë sepse, e gjithë puna që mund të bëjnë strukturat policore, është të ngrejnë postoblloqe, të ndërmarrin kontrolle, por të gjitha pa u shoqëruar me punë operative, nga ajo e heshtura, që e bën zap krimin pa ndodhur ende.
Dhe vijmë më pas tek pazare të tilla të tipit: “Kush i hodhi traktet në klasë” – pra, që po tregove se ku fshihen vrasësit, do kesh 3 milion lekë në dorë (kot me pyet: me tvsh apo pa tvsh?)!
Jo! Çdokush, paguan taksat në shtet me vetëdijen e provokuar nga mesazhet e kryeministrit që të gjitha çfarë shkojnë në shtet, na kthehen si shërbime. Dhe pyesim: kuota prej 3 milionësh, do mbahet sërish nga taksat tona, apo do u mbahet nga rroga atyre që janë paguar për t’i mbërthyer ata, para ose pas krimit? Llogari tjetër nuk ka.
Sepse, kur rezulton që një agjent SHISH-i bashkëpunon me kriminelët, nuk është vetëm burgu me të cilin duhet të ndëshkohet, por ai duhet t’i kthejë shtetit, pra taksapaguesve, pagat e marra në vite kundrejt shërbimit që do ofronte.
Krimi do vijojë të livadhis sërish, madje dhe me hargalisjen e karnavaleve duke qenë se ka zgjedhur të vishet dhe si polic; kjo, derisa mos ketë dhimbshuri dhe përgjegjësi se si menaxhohen taksat e qytetarëve nga ata që paguhen prej tyre për ta luftuar atë. Që nga ministri i pari.
Qeveria, duhet ta kuptojë alfën e arsyeve se pse ky popull e urren t’i paguajë shtetit detyrimet fiskale; jo thjesht se është xhepshpuar, se zaten edhe në ditë më të mira po kështu ka hedhur vicka – jo nuk ka, jo nuk del, jo po është varfëri – por sepse ka humbur besimin se ajo çfarë paguan vërtet i kthehet si shërbim.
Dhe dështimi më i madh në tre vjet i qeverisë së Rilindjes, nuk është ekonomia ende në zgrip, por paaftësia për t’i injektuar sado pak besim e bindje miletit se gjërat po ecin për mirë.
Si tek ndonjë ndeshje e kombëtares, ku ajo vërtet humb, por ndodh të japë sinjale se në radhët e saj ka talente, që dijnë të luajnë bukur e që mund të dhurojnë surpriza. Ka ndodhur kur rrihej dhe 8 – 0. Por ky krahasim nuk vlen për skuadrën e Rilindjes. /tesheshi.com/
