Tashmë, për disa portale pranë qeverisë ai përbën një lajm rutinë. Ai pra, kur dikush i shkruan në facebook Ramës, e ky i fundit ia kthen hazërxhevap me stilin e lindur të ngecjes, qoftë dhe me dy-tre fjalë, një talent i poseduar në aftësinë komunikative të çdo niveli e me çdo kategori, që nuk dihet pse i është tiposur ta praktikojë, tash e disa muaj. Madje duket gati e pabesueshme për të qenë e vërtetë.
Një kryeministër që i vlon koka prej impenjimeve gjithëçfarëshe, me një intensitet të llahtarshëm – dhe Rama është ndër ata vetëpromovohet si punëtor e që e promovon të punuarit si derr – vjen një çast dhe të ofrohet si i ngeshëm për të chat-uar me lloj-lloj frymori që gjendet në hapësirat e online-it – afërmendsh, pa punë – komunikime që prodhojnë gallatë më së shumti, teksa sheh që dhe lajmet e sajuara me të tilla hidh e prit batutash, renditen tek ato showbiz-it – edhe pse politik – si kategori.
Pra, logjika ta thotë se dikush tjetër e bën atë lojë, por në emër të Ramës, si për t’u dhuruar sadisfaksion qindra anonimëve të cilët ia kthejnë me votë kryeministrit fatin e madh të ndërrimit të dy fjalëve me të. E tillë duhet të jetë bërë llogaria, gjersa njeriu që drejton një ndër popujt më hallemëdhenj ka minuta të tepërta për t’u futur në pellgjet e kotësisë së katundeve virtuale shqiptare, e për të ndenjur aty me orë të tëra. E nga ana tjetër, nuk është e njëjta gadishmëri për t’iu kthyer xhevap atyre qindrave që i shkruajnë në adresën e e-mailit dhe për çështje shumë më serioze.
A nuk ishte ai bariu që, ashtu siç opozita, vendosi të bllokojë rrugën me grigjën e tij, i cili tha se i kishte shkruar kryeministrit që nga 2013-ta e nuk kishte marrë përgjigje? Dhe si ai janë shumë gjatë gjithë këtyre viteve, të cilëve u ka mbetur t’i zënë pritë vetëm në facebook, e hallin mundësisht t’ia servirin me batuta rruge, si kusht për të marrë një përgjigje, nëse do u jepet.
E fundit që mund të thuhet është se kjo nuk përfshihet tek cilësitë e qeverisjes. Po të qe për babaxhan, edhe Berisha të merr në qafë. Madje dhe ai tregohet po ashtu i afërt me popullin në facebook. Por kjo nuk e bën politikan dinjitoz, e që më pak një qeveritar kualitativ, që siç është provuar tashmë nuk qe e mundur të bindte se qe i tillë, për sa iu besua pushtet.
Rama kryeministër duke chat-uar në facebook…arsyeja gjithsesi e lë një shteg dyshimi nëse është vërtet ai! /tesheshi.com/
