Në morrinë e pyetjeve mbi çështjen e mprehtë të drogës, kryeministrit Rama iu drejtuar një sosh nga gazetarja Eni Vasili në Studio e Hapur për atë se ku anë bosët e drogës, pra ata të mëdhenjtë që qëndrojnë pas kultivimit dhe trafikimit të sasive të mëdha të lëndëve narkotike të mbjella në territorin shqiptar.
I shtangur për një moment, shefi i qeverisë është përpjekur që ta kalojë me të qeshur duke sajuar një humor çasti – “këtu poshtë tavolinës”, tha ai.
Por, duke e mbledhur veten shpejt e shpejt, kaloi në ofensivë duke ofruar të dhëna për numrin më të madh të të arrestuarve sipas tij gjatë operacioneve anti-drogë, por që të gjithë e dimë se ata përbëjnë hallkën e fundit të një zinxhiri kriminal dhe që nuk ka çuar tek hallka e parë.
Sepse, në gjithë debatin mbi drogën, ajo që anashkalohet janë pikërisht rrënjët e saj, jo gjethnajës së kanabisit, por e trurit njerëzor bazë që e bën të mbijë e të trafikohet.
Po dje, ministri i Drejtësisë, Ylli Manjani përmendi farën e kanabisit, si për të thënë që vetëm kosa e policisë nuk e shuan atë.
“Nga hyn ajo?”, pyeti Manjani në mënyrë retorike, duke iu përgjigjur më pas: “Nga doganat, sigurisht!”. Mirëpo ne nuk kemi parë për asnjë çast dhe në asnjë rast që policia të dyndet edhe ne dogana në betejën e pretenduar kundër drogës.
Më pas, janë disa deklarime të Ramës kohë më parë kur duke komentuar Lazaratin, thoshte se atje ishte një bankë parash deri dhe për media në Tiranë. Që do të thotë pra se ishte deri diku në dijeni se kush ishin bosët.
Ndaj, e vetmja pyetje që ia vlen të bëhet në adresë të pushtetit kur vjen fjala për drogën në Shqipëri, është kjo: kush janë bosët? /tesheshi.com/
