Nga Bujar M. Hoxha
Fati deshi që shorti i Ligës së Europës ta vendoste Skënderbeun në një grup me Beshiktashin, një prej tre skuadrave më të forta e më të njohura turke. Kaq u desh që një pjesë e mirë e të përditshmeve dhe e portaleve shqiptare ta lajmëronin me tituj bombastikë përballjen e pritshme, në një garë të pashembullt se cila prej tyre ta përcillte më mirë e më shpejt “tmerrin” e përjetuar te turqit për ardhjen sërish të “Skënderbeut”!
Katër prej titujve të përzgjedhur, të ngjashëm si dy pika uji mes tyre, të jepnin idenë se kjo ishte gjëma e turqve:
“Dridhen” turqit: Po na vjen Skënderbeu!
Tmerrohen turqit: Po vjen Skënderbeu!
Turqit: Skënderbeu po vjen!
Dridhen turqit: Po vjen Skënderbeu!
Si një ndjekës dhe njohës i hershëm i analizave të mirëfillta sportive në shtypin e median vizive turke, mezi prita që të vinte e shtuna, për të ndjekur në mesditë të mirënjohurin emision sportiv “Gol” te kanali më serioz sportiv turk, NTVSPOR. Doja të kuptoja nëse turqit po dridheshin vërtet nga “Skënderbeu mbi kalë”!
I këndshëm tej mase, emisioni është një bisedë e çiltër, e përjavshme, mes dy gazetarëve sportivë, Gyntekin Onajit (Güntekin Onay) dhe Emek Egesë (Emek Ege), që diskutojnë ngjarje sportive të ditës, marrin në analizë ekipe, lojtarë e fenomene, e risjellin herë pas here foto e pamje filmike të sotme e të shkuara nga jeta futbollistike në Turqi e në botë. Shkurt: një program i shkëlqyer, që nuk ke gjasë ta ndeshësh tek ne.
Për t’u kthyer te tema jonë, pas një endje të gjatë, analizimit të Sportingut të Lisbonës dhe Lokomotivës së Moskës, dy skuadrave të tjera në grup me Skënderbeun, erdhi dhe momenti të flitej për kampionët tanë.
Qenë vetëm pak çaste diskutimi, shprehje e qartë se çfarë do të thoshte ky kundërshtar për ta.
Tre ishin fjalitë, apo, më mirë, frazat e kushtuara Skënderbeut. Skënderbeu është një ekip i dobët … (Beshiktashi) e mund kollaj në të dy ndeshjet … duhet ta mundtë! Shoqëruese të fjalëve qenë nënqeshjet e pakursyera.
Me çka tregova më sipër nuk dua assesi të ul vlerat e ekipit të Skënderbeut, për të cilin pa dyshim që është sukses arritja në fazën në grupe të Ligës së Europës, e as t’u jap të drejtë gazetarëve turq në analizën e tyre. Sepse në futboll asgjë nuk është e pamundur. Mund të ndodhë fare mirë që Skënderbeu të fitojë apo t’i marrë pikë Beshiktashit.
Çfarë desha ta nënvizoja si dukuri negative është padurimi ynë për t’u ngrefosur orë e çast, për t’i sjellë në vëmendje mitet tona vend e pa vend, e për t’i bërë çorap ato dhe me një lojë futbolli.
Kështu që nëse beson se përnjëmend turqit na qenkan “tmerruar” prej “Skënderbeut”, nuk pse të habitesh kur ata të kushtojnë veç ca sekonda kohë! /tesheshi.com/
