Ofensiva e Partisë Demokratike kundër dy kompanive turke që do të investojnë në ndërtimin e një hidrocentrali mbi lumin Drin, arriti një ditë më parë shkallën më të lartë.
Sekretarja për Marrëdhëniet Publike në PD, Grida Duma, paralajmëroi një komani të madhe turke, siç është Suzer Group që të mos guxojë të investojë në Skavicë pasi do ta largojnë nga vendi.
“Suzer dhe çdo kompani tjetër janë të paralajmëruar edhe sot me datë 24 maj 2016 nga Partia Demokratike e Shqipërisë se: koncesioni korruptiv i Skavicës do të zhbëhet. Se një hetim i plotë dhe i gjithanshëm i kësaj afere përfshirë takimet, udhëtimet dhe allishverishin korruptiv Rama-Ahmetaj-Suzer, do të bëhet, në mos sot, nesër. Partia Demokratike do ta zhbëjë këtë koncesion me forcën e ligjit, si cdo koncesion e aferë tjetër korruptive të Edi Ramës”, deklaroi Duma.
Një qëndrim politik që dukshëm është i ashpër dhe kundërshtues ndaj nismës së një prej kompanive më të rëndësishme në Turqi në fushën e energjisë.
Partia Demokratike mund të ketë padyshim argumentet e saj, mund të ketë arsyet e saj përse e kundërshton dhënien e koncensionit të hidrocentralit të Katundit të ri ndaj një kompanie turke.
Por këto arsye nuk duhet të kalojnë në dhunë verbale apo qëndrime abrasive, të cilat krijojnë një klimë totalisht jonormale, jo thjesht me kompaninë Suzer, por ndaj të gjithë korporatave dhe biznesit turk.
Asnjëherë tjetër nuk ka ndodhur një qëndrim kaq i prerë ndaj një kompanie të ndonjë vendi tjetër për shembull.
Partia Demokratike ka qenë në pushtet 16 vjet në harkun e 20 viteve dhe nuk ka pasur kurrë një qëndrim të ngjashëm ndaj kompanive greke apo të edhe të vendi tjetër, madje edhe serbe e serbo-boshnjake.
Turqia është një vend më shumë se mik i Shqipërisë. Biznesi turk ka qenë dhe është “bujar” ndaj zhvillimeve në Shqipëri.
Një qëndrim i tillë krijon një hendek jo thjesht të panevojshëm, por edhe të dëmshëm.
Në Shqipëri ndodhet prej shumë vitesh Dhoma e Tregtisë shqiptaro-turke. Ajo ka selinë e saj në Tiranë në mes të bllokut dhe me përfaqësues permanent në Tiranë. Partia Demokratike, shumë mirë mund të dërgonte rezervat e saj pranë kësaj organizate, mund të takonte ambasadorin e Turqisë në Shqipëri dhe zyrtarisht të paraqiste ankesat e saj me shkrim dhe me gojë.
Partia Demokratike është anëtare e Partive Popullore Europiane, anëtare e së cilës është AK Parti, pra partia në pushtet në Turqi.
Shkurt e shkoqur, ka rrugë ku nuk është e nevojshme të përdoret as shantazhi e as kërcënimi verbal.
Ndryshe, mund të kuptohet se kemi të bëjmë me një qëndrim tendencioz dhe me qëllim të caktuar: të trembë biznesin turk që investon në Shqipëri.
Kompania Suzer nga ana e saj i ka dërguar një letër zyrtare PD-së pak kohë më parë, por selia blu nuk denjoi t’i përgjigjej.
“Grupi Süzer për një periudhë më të gjatë se gjysmë shekulli ka realizuar investime të konsiderueshme në shumë sektorë, kryesisht në atë të pasurive te patundshme, turizmit, financës dhe energjisë jo vetëm në Turqi, por edhe në shumë vende të njohura të botës, si dhe është një bashkësi e rëndësishme kompanish që u siguron punësim shumë njerëzve. Ndërmjet të tjerash ne si Grupi i kompanive Süzer kemi marrë pjesë shumë herë në tenderët që janë mbajtur si në nivel kombëtar, ashtu edhe në arenën ndërkombëtare; kemi fituar projekte të përmasave mjaft të mëdha dhe të gjitha i kemi realizuar me sukses. Për shembull, një nga projektet më të rëndësishme që kemi vënë në jetë është banka jonë që ushtron aktivitetin e saj në Kroaci. Duam të theksojmë me rëndësi këtu se një tjetër investim i konsiderueshëm që kemi bërë është edhe Banka BKT, një nga bankat më të rëndësishme të Shqipërisë”, theksohet në letrën e korporatës turke. /tesheshi.com/
