48 orë para shkuarjes në parlament të reformës në drejtësi, Opinioni, pjaca më e lartë e debatit politik, e jo vetëm në Shqipëri, rezervoi një puntatë pikërisht për këtë çështje, ndër me delikatet e politikës shqiptare në 25 vite.
Dhe nisur nga kjo, puna e donte që të përzgjedhurit për debat të ishin gjithashtu të “matur me pe” për sa i përket statutës së lartë publike mbi llojin e debatit në fjalë, si dhe zotësisë për t’u përgjigjur në terma sa më profesionalë, qoftë edhe politikë.
Që do të thotë se së paku palët duhej të ishin sa nga sfera juridike e konstitucionale jashtë politikës, e sa nga kjo e fundit në nivelin e ekspertëve partiakë. Por as njëra dhe as tjetra!
Publikut iu servirën figura tejet të konsumuara të debatit publik, që zakonisht rrëshqasin dhe në muhabete kafeje para kamerave nga mungesa e formimit dhe e klasit të duhur për t’u përballuar me tema të koklavitura, edhe si kjo e reformës.
T’i marrim me radhë:
Preç Zogaj – i gjithhershmi i debateve, edhe të atyre me natyrë showbiz-i. Për shkak të përvojës së gjatë e të pashkëputur në raportet me politikën, e po ashtu i sprovuar në ligjërimin analitik, ai vuan vetëm mungesën e koherencës në disa qëndrime pas kalimit sa në një kamp politik në tjetrin. Gjithsesi, mbetet i pranueshëm, edhe pse i lodhshëm në sforcon për të patur të drejtë në çdo lloj pozicioni politik që mund të ndodhet.
Fahri Balliu – një ish-komunist i transformuar në demokrat finok, ka aftësinë e lindur për ta degraduar në muhabet paçeje edhe temën më serioze. I ardhur nga fusha e letrave, ku është dalluar sidomos në denoncimin e armikut të klasës që luftonte socializmin duke sabotuar termoçiftet, por i pleksur në mënyrën më të shëmtuar të mundshme me politikën, ka humbur çdo lloj identiteti publik për t’u dalluar në një fushë të caktuar. Por ja që ka fatin të ftohet për të folur për reformën në drejtësi!
Agron Gjekmarkaj – mbetet mister thelbi i një katapultimi nga bota e letrave në atë të politikës, pa mundur të befasojë me talent të veçantë në asnjërën. Vështirë t’i gjesh një arsye intelektuale për të qenë i pranishëm në debatin politik, e aq më pak në atë për reformën në drejtësi.
Baton Haxhiu – Në mos ka qenë i pranishëm në debat nga rastësia, i ndodhur në Shqipëri për pushime, vështirë të gjesh arsye në profilin e tij publik për t’i bërë ftesë që nga Prishtina të vijë në Tiranë për ta dhënë dhe ai një mendim se ç’po ndodh me reformën.
Anila Basha – nuk dihet të gëzojë ndonjë status tjetër veç asaj të “shoqes” ose “mikes” për të qenë aq familjare në atë, pra, që pretendon të jetë, ose dhe është, pjaca e lartë e debatit në media, por jo gjithnjë për arsye tej profesionale. Publiku i thjeshtë ende nuk ka arritur të kapë në ligjërimin e saj “shkakun e artë” të përzgjedhjes për të qenë pikërisht ajo një opiniondhënëse për çështje të politikës. Me fraza gazetareske që nuk shkojnë tej kafes prapa godinës së PS-së, asaj i dhurohet sakaq skeptri i debatueses në publik për reformën në drejtësi.
Dhe së këndejmi, reforma në drejtësi merr një goditje që një shpërgëj, madje pa dalë ende në jetë, për t’u shfaqur dhimbshurisht autike.
Pa llogaritur këtu dhe goditjen që merr opinioni publik, kur media i servir një cilësi të tillë debati.
Së kendejmi, media e humb të drejtën për ta denoncuar dhe kritikuar politikën, derisa vetë nuk mundet të japë një model serioziteti dhe përgjegjshmërie. /tesheshi.com/
