Nga: Ylli PATA
Rasti i Shukri Xhelilit është kthyer prej 12 orësh në një kakofoni virale duke komentuar dhe analizuar çdo që nga akti flagrant dhe skenat e neveritshme të një zyrtari të shtetit shqiptar.
Qeveria e shkarkoi ndërsa prokuroria nisi procedimin për abuzim me detyrën duke ofruar punë në këmbim të favoreve trupore.
LSI-ja kërkoi nga Edi Rama që të kërkojë falje publike për kandidimin e Shukri Xhelilit.
Në fakt PS-ja sipas të gjitha gjasave do të ndëshkohet në mënyrë të merituar nga elektorati në Dibër pas 45 ditëve në zgjedhjet e pjesshme, duke rikthyer “mbretërimin” e Partisë Demokratike në verilindje të vendit.
Por ky fakt është ulëritës dhe mund të shërbejë për të nisur një katharsis masiv në administratën shqiptare.
Edi Rama, duhet të reflektojë dhe të mendojë se si vuri kandidat një shitës pakice të Sadri Abazit, ndërkohë kur Peshkopia, por edhe gjithë treva e Dibrës gjallon me intelektualë dhe përfaqësues të aftë për të bërë administratorin.
Si ka mundësi kur socialistët lokalë bënë propozime për të tjerë njerëz, prevaloi urdhri arrogant?
Dhe në fakt arroganca të gris dhe brekët…
Por një gjë është më ulëritëse dhe kërkon një reflektim dhe sjellje të ndryshme në administratë.
Në shumë, shumë institucione publike gëlojnë zyrtarët kokorroçë e injorantë allashukri që mbajnë në punë femra duke marrë favore seksuale.
Më shumë se një herë janë dhënë fakte nga emisionet investigative, ndërkohë që raste të tilla ndodhin rëndom edhe në institucione mediatike.
Në një ent publik të medias, drejtuesi i saj ka emëruar një post të lartë një person me të cilin ndan shtratin.
Por ka edhe më. Deputetë që abuzojnë në mënyrë skandaloze dhe që raste kanë shkuar edhe në organet e hetimit, siç ishte ai i drejtorisë arsimore në Lushnjë.
Por megjithëse ka ndëshkime sporadike, ngjarja zgjat 3 ditë dhe harrohet gjithçka.
Turpi hahet me bukë dhe këta lloj zyrtarësh bëjnë qarkullim në administratë. Sepse ata janë të domosdoshëm ngaqë janë të kollaj menaxhueshëm, të shantazhueshëm.
A nuk ishte rasti i kreut të bashkisë së Kamzës disa vjet më parë dhe asgjë nuk ndodhi, madje u dhunua denoncuesja?
Kush flet për moral në këtë politikë që pikërisht të moralshmit i tall dhe i largon ditë mbas dite?
Kush janë të moralshmit: PD-ja apo LSI-ja?! Ndërkohë PS po rrëshqet frikshëm në arrogancën e abuzimit që në debatin publik, ndërkohë që ka pasur traditën edhe të një diskutimi formal.
Dibra, edhe pse në të kaluarën ka pasur zyrtarë si Shikriu, ka promovuar njerëz me moral. Por pas gjysmës së dytë të viteve 90, të moralshmit quheshin “dede”, duheshin “çunat e shkathët” që “bëjnë punën”.
Kështu edhe në qytetet e tjerë. Por problem është kupola, në Tiranë, ku institucionet qendrore gëlojnë nga “hamshorë” që nuk kanë frikë të kërcënojnë me vendin e punës që është “si ujët e pakët” duke abuzuar me femrat.
E në këtë rast duhet një dënim më shumë se shembullor. Një dënim unikal që të shkaktojë efektin tronditës në mënyrë që askush nga manjakët që arrijnë në pushtet të mos guxojë të përdhosë institucionin.
Shembuj ka plot. Por s’mund të ndalemi vetëm me Shukriun. Duhen fshirë të gjithë shuket e tjerë që gëlojnë në administratë, media, universitete etj./tesheshi.com/
