Studiot e debateve televizive, ku dhe aty reflektohet dhe një çoroditje shoqërore, ofruan një tjetër skenë përplasjeje; atë mes Koço Kokëdhimës dhe Sonila Meços. I pari qe ftuar në Tempora-n e kësaj të dytës dhe në një moment nisi të shfryjë ndaj medias, duke akuzuar gazetarë se kanë “marrë para nën dorë” nga dinosaurë (politikë), siç u shpreh, që sipas tij kanë marrë peng emisionet e studiot. E tha këtë nga një emision dhe nga një studio!
Më pas quajti “sistemin e qelbur”, ndërkohë që – nuk dihet se për cilin sistem e kishte fjalën – sistemin i tregut që i ka dhuruar goxha benefite përfitimesh? Kujto blerjen e disa ndërmarrjeve nga procesi i privatizimeve këtu e para 20 viteve, – apo sistemin elektoral që i bëri të mundur futjen në parlament si deputet nga lista e PS-së.
Po, mundet që gazetarët edhe të marrin para nën dorë, po ç’lidhje ka kjo me Kokëdhimën? Nën ç’persekutim ndihet Kokëdhima që shfryn kaq ashpër studiove? Ai nuk është një i mënjanuar, së paku nga media, një i nëpërkëmbur; ai vijon të jetë ende në qendër të interesit mediatik e për këtë duhet të ndihet i përkëdhelur.
Pos kësaj, Kokëdhima vijon të jetë prezent me “Shekullin” e tij në mendimin publik shqiptar. Paçka se një gazetë me kuota prestigji të rëna, ai me këtë gazetë është në treg, ka mundësi ta thotë atë që mendon. Ka qenë përmbi 20 vjet kështu, duke i patur gati të gjitha çfarë mund të dëshirojë një njeri me ambicie. I mungonte vetëm politika. U fut në të, u bë deputet. Nisi rënia, për dhjetra arsye. U nda me Ramën dhe vendosi të bëjë historinë e tij personale në politikë. Themeloi Zgjidhjen. Vazhdon ta promovojë, atë dhe idetë e tij. Askush nuk po e pengon. Është thjesht në lojën e tregut të ideve, emrit, imponimit, siç ka luajtur në tregun klasik ofertë-kërkesë, të cilin e mbron me zell. Mund të fitosh por dhe mund të humbasësh. Ka rastin për të treguar veten nëse mund të fitojë zemrat e njerëzve. Nuk i fiton dot, ndaj shfryn? Mundet. Nuk është vetëm ai. Jeta publike shqiptare është plot sosh. Janë peng të fabulës së “dhelprës me rrushtë”. Një pjesë prej atyre që e urrejnë Ramën vijnë bash nga kjo kategori. Janë thjesht zhurrmues por aspak frymëzues. Dhe dështimin e tyre janë faturojnë shumëçkaje, deri dhe qeverisjes! /tesheshi.com/
