Duhej të trokiste kriza ekonomike që shqiptarët të mbanin duart teksa drejtoheshin për të blerë shashka, kapsolla e fishekzjarre gjithëfarëllojesh, duke e shndërruar çdo fundviti në një ferr të vërtetë urban, sigurisht për atë kategori njerëzish që nuk i kishte lënë mendja, sqimtarë dhe me edukatë, por dhe me ndonjë hall fizik, si fjala vjen gratë shtatzëna apo të moshuarit.
Dhe nuk dallohej aty se cili ishte i rrituri e cili fëmija. Të dy palët, të shkrirë në një, merrnin e jepnin me plasaritje ku dhe si të mundnin, pa pyetur për asgjë rreth e rrotull, me një injorim total të etikës së bashkëjetesës, shprehje e një egocentrimi të frikshëm që gjente paqe vetëm në panikun e të tjerëve.
Shihje të vegjël që këndëlleshin nga pëlcitjet e njëpasnjëshme, por shihje dhe mosha madhore që po ashtu, nuk e kishin për gjë t`ja bënin dhe ata njëherë “bam”, duke u ngërdheshur më pas në një vetëkënaqsi idiote, pa u turpëruar aspak nga vështrimet e vëngërta të gjindjes përreth.
Ato lloj shfaqjesh pra, me fëmijë e të rritur të hazdisur që riciklonin çdo fundvit një “mini-97”-të me kapsolla, ishte një prej dramave tona shoqërore e sociale që pak merrej seriozisht.
Vitin e kaluar, Komuna e Tetovës nxorri një vendim që gjobiste të gjitha ata që do ndërmerrnin të tilla veprime në cënim të qetësisë publike. Pra, është detyrë e shtetit që t’a vërë në binarë njerëzinë kur e nis e del prej tyre dhe, po të ketë vullnet dhe sensitete positivE, mundet ta bëjë këtë.
Ndërsa tek ne, do e kemi këtë lloj njerëzie dalë binarësh derisa edhe shteti nuk është ende në binarë.
Tashmë, prej 2-3 vitesh ne thjesht po i falemi krizës ekonomike, rrënimit të xhepave, që nuk po e përjetojmë atë batërdinë e pak viteve më parë, kur qejf o qejf, i bënim paratë rrush e kumbulla me englendisje të ardhura nga Kina.
Ndërkohë që e kundërta duhej të kish ndodhur: nga ankthi i 97-ës, duhej të ishim ndër të rrallët popuj që nuk do i vinim shkresen asgjëje që pëlcet, qoftë dhe që bën dritë kimikisht.
Dramatike kur një popull tërhiqet pas së keqes, edhe pse me fjalë e uren atë. /tesheshi.com/
