Në disa media online ka qarkulluar të enjten një mesazh i pazakontë me frymë denoncuese, përcjellë për publikun nga Denis Minga, ish-këshilltar pranë Avokatit të Popullit, Igli Totozani.
Në mesazh, Minga zbërthente një skemë korruptive të Totozanit, me ndihmëtare bashkëshorten e tij, gjë që në fakt është përfolur prej kohësh. Kjo e vë Avokatin e Popullit (jo si institucion, por si individ, pra Totozanin) në pozitën e njeriut që tashmë i duhet një avokat për t`u mbrojtur, në mos në rrugë juridike, patjetër në sferën publike.
Një “avokat Populli” mund të akuzohet për shumëçka, si fjala vjen për mungesë efiçence, protagonizëm apatik, selektivitet gjatë mbrojtjes së shtresave dhe aktorëve të ndryshëm shoqërorë, por që të akuzohet si grykës fondesh, kjo sigurisht që është e rëndë.
Dhe për Totozanin, kjo është njolla e dytë në personalitetin e tij publik, qyshkur u përfol se vartës të tij në institucionin e Avokatit të Popullit, e kanë shqepur në dru eprorin e tyre. Por kjo u harrua shpejt, për t`u rikthyer sërish emri tij, kësaj rradhe si i akuzuar për korrupsion, prej një ish-vartësi.
Igli Totozani erdhi si Avokat i Popullit, si një emër deri diku gjithëpërfshirës, ndonëse me protagonizmin e tij publik në media, endej kah terreni i së majtës.
Ai u propozua për postin e Avokatit të Popullit nga Edi Rama, kur ky i fundit ishte në opozitë, pas një proçesi konkurimi, që më gjasë ishte i pavlerë për shkak të paracaktimit me shenja të qarta.
Po të qe për një konkurs prej së vërteti, Igli Totozani nuk mund të dilte kurrë mbi emrin e Përparim Kabos, fjala vjen.
Fillimet i pati premtuese, kur u angazhua me shumë “sportivitet” për t`u zgjidhur hallin ca të pastrehëve të komunitetit rom. Por më pas nisi të shfaqte një veneracion të pazakontë – vështirë ta dalloje nëse personal apo institucional – karshi komunitetit LGBT, duke e paraqitur këtë kategori si më të persekutuarën, shoqëruar kjo me një avokati të tejskajshme, ku gati-gati vetë populli që duhej mbrojtur përngjante si një masë gjigante homoseksualësh.
Dhe prej atëhere, emri dhe personaliteti i tij nisi të pësonte të çarat e para me lajme hiç të hijshme, siç ishin pra rrahja që i kishin bërë vartësit (sigurisht, jo për arsyen e mësipërme), e së fundi siç kjo për afera korruptive.
Kjo pra e ka çuar Totozanin në pozitën e një Avokati Populli që është katandisur për t`u avokatuar. /tesheshi.com/
