Partia Demokratike ka vendosur dy kauza në qendër të saj: largimin e deputetëve Kokëdhima Suli dhe Leskaj si dhe kundërshtimin me fuqi të madhe të ndërtimit të një parku lojërash tek liqeni Artificial në Tiranë.
Thuajse të gjitha strukturat e PD-së së Tiranës, por edhe deputetët më të zëshëm, kanë nisur një ofensivë politike dhe fizike për ta penguar këtë park. Ndërkohë nga media shumë pranë PD-së flitet për një aleancë mes PD-së dhe LSI-së për ta kundërshtuar Erion Veliajn.
Ndërkaq, në gjithë këtë betejë askush nga të fuqishmit e Partisë Socialiste nuk ka dalë në mbrojtje të kryetarit të Bashkisë së Tiranës.
Por realisht ç’po ndodh dhe pse është kthyer liqeni në epiqendrën e guerilies urbane?
E gjitha kjo lojë është një politikë e pastër për influencë. Erion Veliaj është kthyer realisht pas Kryeministrit, njeriu më me pushtet në Shqipëri dhe kjo shumë shpejt mund ta kthejë në rrezik potencial për shumë politikanë pasi mund t’i humbasë pushteti më i rëndësishëm që është ai i influencës.
Ilir Meta thuajse është distancuar krejtësisht nga mbështetja e Bashkisë së Tiranës, megjithëse ka 40 përqind të vendeve të punës deri dhe nënkryetarin e bashkisë. Ndërkaq, 3 ministra të LSI-së nuk kanë firmosur lejen e ndërtimit që ka dhënë Këshilli Kombëtar i Territorit. Janë pikërisht Ylli Manjani, Lefter Koka dhe Edmond Haxhinasto që nuk kanë vendosur firmën tek dokumenti i Kryeministrit të tyre duke rrezikuar kështu një përplasje të madhe. Vetëm Panariti ka firmosur, sa për të treguar se nuk është çështje LSI-je, por mendim personal. Jashtë logjikës ky veprim, nëse njihet funksionimi i LSI-së.
Tek liqeni artificial fshihen interesa shumë të forta. Me ardhjen në pushtet, Veliaj fshiu disa leje “Vip” me shumë peshë të disa ndërtuesve që janë shumë afër Sali Berishës dhe Lulzim Bashës.
Ndërtuesi u tërhoq, por negocioi me Ilir Metën për t’i dhënë atij “nderin” e influencës. Mirëpo Rama e Veliaj nuk pranuan dhe tashmë ka nisur lufta. Një përplasje e fuqishme interesash që ngjan me atë të vitit 2002 me Edi Ramën kur lobi i ndërtimi nisi një luftë të madhe dhe në fund fitoi kryebashkiaku. Pas kësaj, të gjithë i shkuan pas avazit Edi Ramës.
Po sot, çfarë do të ndodhë?!
Beteja sapo ka nisur dhe është mjaft interesante…
/tesheshi.com/
