Sot, një ditë kur presidenti Meta, në një variant tejet shvjekian do zbresë në shesh kundër qeverisë, me një kuazë të stisur me nene kushtetuese, atë do e ndjekë pas dhe PD.
Një ditë më parë, kreu i saj Basha, pasi më parë kishte urdhëruar stukturat që t’i përgjigjeshin thirrjes së Metës – thënë ndryshe, një furnizim me masë njerëzore për aksionin e presidentit, e deklaroi dhe vetë se do jetë aty, duke zgjedhur dhe ai, si shumë të tjera emra të njohur publikë, që të bëjnë sofistin në motivin se përse do jenë në bulevard. Basha tha se do jetë ai si qyetar, si prind, si bashkëshort(!), në mbrojtje të Kushtetutës. Kjo e fundit si shkak, nenet e saj, aty ku Meta ka ndërtuar kauzën e tij, janë qartazi një nga truket më të trasha.
Në politikën shqiptare, debat mbi shkelje kushtetuese të pretenduara ka patur kurdo e për shumë çështje. Edhe do të ketë gjithashtu. Si në një proces gjyqësor, ku avokati, prokurori e gjykatësi, jo domosdoshmërisht pajtohen ndonëse u referohen të njëjtave ligje e nene.
Nga ana tjetër, edhe mazhoranca e akuzon Metën për shkelje të rëndë kushtetuese. Madje për këtë i ka çuar dhe në Venecia vendimarrjet e tij të paprecedenta, e për këtë arsye edhe do ta shkarkojë. Pra, në këtë pikë, se kush e ka shkelur Kushtetutën, janë të dy palët në të njëjtin pozicion; ngjashëm me faktin se ndërsa Meta akuzon mazhorancën se kërkon të kapë Gjykatën Kushtetuese, edhe mazhoranca pretendon të njëjtën gjë për Metën.
Por çështja është te PD, e cila ka vendosur t’i dorëzohet Metës. Dy vite larg zgjedhjeve pas 8 vite në opozitë, PD-ja duhet të ishte sot një parti e rigjeneruar, e rifreksuar, e rinërtuar në vizione, pa Berishën nëpër këmbë e me një lidership shpresëdhënës, pra me shenja të qarta se është gati për të ardhur në pushtet.
Këto sot jo që s’ekzistojnë, por degradimi bëhet akoma më i madh kur sheh që një parti e traditës politike, me potenciale të jashtëzakonshme në të gjitha nivelet, me përvoja të mëdha pushteti e opozitës, ka rënë në një gjendje frustrimi politik sa të shijojë ekzistencën e vet nga bashkëpunimi me Ilir Metën, duke u vënë në shërbim të këtij të fundit.
E për të sot, Metën, është ditë e madhe jo se do i tregojë dhëmbët mazhorancës, porse arriti të nënshtrojë Berishën e Bashën, duke i bërë investuesit kryesorë të lidërshipit të tij opozitar nesër. Eshtë vërtet një ditë e errët për PD-në! /tesheshi.com/
