Në vend të një respekti, të munguar ashiqare, për mijëra muslimanë që festuan Kurban Bajramin, të shprehur me heshtjen totale e me mungesën qoftë të një urimi a lajmi për këtë festë, një faqe elektronike zgjedh diçka krejt ndryshe, kokë e këmbë provokuese.
Ja ç’titull ofroi ajo paraditen e 24 shtatorit, në një postim në orën 10:09, duke lajmëruar vjedhjen apo dëmtimin e një kishe: Përdhoset Kisha e Shën Kollit në Lezhë, gjatë natës së Kurban Bajramit.
I paturp si titull lajmi, shkronjat më tej nxihen akoma më shumë nga injoranca dhe pafytyrësia e atij që ka guxuar të shkruajë jerm, pasi përmbajtja e materialit nuk të thotë asgjë për atë çka kërkohet të përcillet.
Për t’u bindur plotësisht për kuturisjen prej debili të lajmshkruesit, po i citoj tre paragrafët e lajmit:
Persona të paidentifikuar kanë hyrë natën e kaluar në Kishën e Shën Kollit në Lezhë duke dëmtuar objektet e kultit.
Dy ikona u hoqën dhe u hodhën në tokë, sipas policisë. Eshtë thyer një statujë dhe një mbajtëse qirinjsh, raportohet nga uniformat blu.
Efektivët në vendngjarje kanë konstatuar se hajdutët kishin thyer xhamat e dy dyerve dhe dy dritareve të kishës së Shënkollit. Nuk jepen detaje nga policia, nëse kisha është vjedhur, apo ky sulm ka pasur për qëllim vetëm përdhosjen e objekteve të kultit.
Ja, më thuaj i dashur lexues, pasi ta kesh lexuar me kujdes këtë gjoja lajm, ç’lidhje ka nata e Kurban Bajramit, e vënë ligësisht në titull, me atë çfarë njoftohet më poshtë?
Ata që kanë hyrë në kishë, nga dera a dritarja, në qofshin hajdutë, as që diskutohet se nuk kanë punë as me natën e as me ditën e Kurban Bajramit. E në qofshin përdhosës, dy herë me tepër nuk kanë lidhje me natën a ditën e Kurban Bajramit!
Ky nuk është as lajm, e as informim. Jo, është maskarallëk, është pisllëk, është provokim!
Ta mprehësh “lapsin” nuk do të thotë se do të shkruar gjithherë gjëra me mend, me peshë, të kulluara qelibar. “Lapsi” i mësipërm, më tepër se për të shkruar, është përdorur siç duket për të shpuar! /tesheshi.com/
