Nga Ylli Pata
E enjtja e 25 shkurtit 2016-të do mbahet mend në historinë politike shqiptare si dita kur një parti e konsideruar e djathtë huazoi dhe përdori më pas metoda të një force të konsideruar si e majtë.
Eshtë fjala për vezët që deputetë të PD-së lëshuan drejt kryeministrit Rama, një akt që lëvrohet rregullisht nga “Vetëvendosje” në rrethana urbane, por dhe parlamentare, e që i parapriu gazit lotsjellës.
Interesant është fakti se muaj më parë, ish-lideri demokrat Berisha është treguar i ashpër ndaj VV-së gjatë një fjalimi në parlament. Ai tha se gazi i është i papranueshëm; por nuk ka sesi të mendohet se fjala është thjesht për lëndën dhe jo për modelin.
Në fjalën e tij, Berisha e përligj Asocacionin dhe Demarkacionin me faktin se Kosova është e pavarur gjithsesi, e që ndjek logjikën se opozita kosovare, më konkretisht “Vetëvendosja”, nuk ka pse sillet si revolucionare në parlament.
Dhe deri këtu ai tregohet politikisht korrekt.
Por akti i kësaj të enjte në parlament e përgënjeshtron qëndrimin e mbajtur muaj më parë. Mjaft të thuhet se dhe deputeti demokrat Strazimi, aktin e gjuajtjes me vezë drejt kryeministrit e ka justifikuar me të njëjtën logjikë “vetëvendosjeje” që justifikon gazin.
I pyetur nëse “është e ligjshme që të qëllosh me vezë?”, Strazimiri përgjigjet në mënyrë retorike se “a është e ligjshme që të fusësh kriminelë në parlament?”.
Dhe duke iu rikthyer fjalimit të Berishës kundër “Vetëvendosje”-s, kundërshtimi i përdorimit të gazit nuk sesi të kuptohet si kundërshti për lëndën në kuptimin ngushtësisht të fjalës, pra sendin e përdorur kundër rivalit; që ndryshe duhej përkthyer si: “ju mund të qëlloni me ndonjë vezë a domate, por jo të përdorni dhe gaz lotsjellës”; jo, kundërshtimi i Berishës duhet kuptuar si mospranimi i modelit politik me nuanca të një të majte revolucionare.
Sepse diferencat ideologjike mes dy kahjeve nuk janë në përdorimin e sendeve, por në atë të modeleve.
Në këtë pikë, veza dhe gazi lotsjellës janë po e njëjta gjë. /tesheshi.com/
https://www.youtube.com/watch?v=udPFkQNY7Gs
