Ka bërë përshtypje në qarqet politike të Tiranës heshtja e Ilir Metës dhe e LSI-së pas thirrjes së hapur të Sali Berishës për armatosjen e popullatës; një fakt që është vënë në dukje edhe nga një shënim i bërë në tesheshi.com.
Gazetari i njohur Armand Shkullaku, në një koment të tijin të para dy ditëve e nënvizonte këtë fakt, duke theksuar se kemi të bëjmë me një rast që tregon qëndrim politik të qartë.
Pas qëndrimit të Shkullakut, Artur Zheji, një gazetar dhe analist i njohur, i cili që nga viti 2008 ka qenë bashkëpunëtor i afërt i kreut të Kuvendit Ilir Meta, madje ka kandiduar edhe për deputet nga radhët e LSI-së, e që para pak vitesh bëri dhe një shkrim jo të zakontë kushtuar figurës politike të Ilir Metës për nga sasia e madhe e ditirambeve kushtuar atij, tentoi t’i jepte një kahje përkrahëse qëndrimit të ish-kryeministrit Berisha.
Duke e thënë troç dy herë, një herë në një editorial tek opinion.al dhe një herë në emisionin Zululand të Mustafa Nanos në TemA TV, se dhe atij se pëlqente të kishte një armë: “Ta mbaj në kasafortë, ta grasatoj dhe të gjuaj kur kërcënohet jeta e familjes”.
Po çfarë përmban qëndrimi i zotit Zheji, me tepër se shprehja e këtij veneracioni dhe nevoje njëherësh për armën?!
E para është kanalizim i thirrjes së Berishës duke e cilësuar si një “propozim”.
Por kujtojmë se fjalëpërfjalshëm, ish-kryeministri deklaroi në Kuvend: “u bëj thirrje qytetarëve të armatosen”; pra që nuk ishte një propozim i pastër.
Por qëndrimi i Artur Zhejit ishte paksa i dyzuar: nga njëra anë bënte thirrje që doktori duhet të ketë kujdes dhe nga njëra anë e konsideronte thirrjen e tij si të djathtë klasike.
“Personalisht Doktori më sulmoi live në media. I tejnxehur ndoshta. I zhgënjyer apo se ashtu i vjen kur ndjek sintaksa të ndryshme arsyetimi nga e vetja. Papritur dot përfundimin e arsyetimit. Është pasionant. Punë për të.
Por kjo rrethanë antipatike, nuk më errëson gjykimin që të arsyetoj se thirrja për armatosje të popullit në formë ligjore, në institucionin e Kuvendit, është një “histeri irracionale”. Përkundrazi, është një doktrinë e djathtë, së cilës ndoshta me 1001 difekte, ai, Doktori pra, i ka dalë për zot.
Edhe unë do të doja të kisha një armë në shtëpi. Dhe nëse do të kishte një ligj që do të më lejonte, do ta blija një të tillë. Do ta fusja në një dollap të blinduar me çelës dhe dryn, do ta vajisja dhe do ta kisha. Që të mbroja fëmijët e mi dhe familjen time. Për çdo rast! Duke uruar që ky rast të mos vinte kurrë! Por do të doja ta kisha si një mbrojtje ekstreme ndaj nderit dhe jetës së familjes sime”.
Në fakt s’mund të jetë doktrinë një apel për t’u armatosur popullsia, pasi doktrina përbën një ideologji që duhet të implementojë shteti për të mbrojtur qytetarët.
Por justifikimi me konceptin “doktrinë” është një qëndrim i rëndësishëm që e shfryn zhurmën që Partia Socialiste bëri pas deklaratës së doktorit në Parlament, çka dhe i kushtoi 10 ditë pra përjashtim nga Kuvendi.
Vetë Kryeministri Edi Rama i bëri thirrje Prokurorisë të hetojë ish-kryeministrin.
Por duket qartë se aleati i tij kryesor Ilir Meta duket se mendon ndryshe, gjë që duket qartë nga qëndrimi i Zhejit. /tesheshi.com/
