Mensur Krasniqi
Republika e Maqedonisë sot shënon 24 vjet nga referendumi i mbajtur me sukses, në të cilin qytetarët e Maqedonisë u deklaruan për shtet të pavarur dhe sovran.
Me shumicë absolute, mbi 95 për qind të qytetarëve që dolën në referendumin e 8 shtatorit të vitit 1991, iu përgjigjën pozitivisht pyetjes së referendumit “A jeni për Maqedoni të pavarur me të drejtë të hyjë në fuqi në aleancën e ardhshme të shteteve sovrane të Jugosllavisë”.
Referendumit i parapriu Deklarata për pavarësi të cilën Parlamenti i parë i Maqedonisë shumëpartiake e miratoi më 25 janar të vitit 1991.Formalisht, vullneti i popullit për shtet të pavarur ishte konstatuar me Deklaratën për pranimin e rezultateve të referendumit më 18 shtator të vitit 1991 në Kuvendin e Republikës së Maqedonisë.
Hapi i ardhshëm i rëndësishëm për përforcimin e pavarësisë së shtetit ishte miratimi i Kushtetutës më 17 nëntor të vitit 1991. Referendumin në aso kohe e kishin bojkotuar një pjesë e shqiptarëve dhe deputetët e tyre. Dhjetë vite më vonë Kushtetuta ishte plotësuar pas konfliktit të 2001-ës dhe nënshkrimit të Marrëveshjes kornizë.
Pavarësinë e shtetit maqedonas e para e kishte pranuar Republika e Bullgarisë, me cka kanë vijuar Turqia, Slovenia, Kroacia, Rusia, Bosnë dhe Hercegovina etj.
Shteti u pavarësua edhe me monedhat e saja me sjelljen e denarit më 26 prill të vitit 1992, ndërsa më pas kishte krijuar edhe Armatën e tyre.
Subjektiviteti juridiko-ndërkombëtar i shtetit ishte konfirmuar më 8 prill të vitit 1993, ku me aklamacion në Parlamentin e përgjithshëm të Kombeve të Bashkuara, Maqedonia është pranuar si anëtarja e 181 e Organizatës Botërore. Për shkak të kundërshtimeve dhe shtypjeve që bënte Greqia, që nuk e pranon emrin kushtetues të Republikës së Maqedonisë, anëtarësimi në Kombet e Bashkuara është shkruar nën referencat e përkohëshme “ Ish Republika Jugosllave e Maqedonisë(FYROM).
Ndërkaq pas ndërhyrjeve të Kombeve të Bashkuara, Shkupi dhe Athina kanë filluar negociatat për zgjedhjen e problemit që ka Greqia me emrin kushtetues të Maqedonisë, negociata që sot e asaj dite po vazhdojnë.
Në vitin 2005 Maqedonia ka fituar statusin e shtetit kandidat për anëtarësim në BE, ndërsa më 2008 edhe rekomandimin e Komisionit Evropian për fillimin e negociatave me Unionin, e që ishte përsëritur edhe këtë vit. /tesheshi.com/
