Gazeta britanike e tipit tabloid, Daily Mirror ka botuar një shkrim bombastik në numrin e së dielës, ku thotë se ISIS kontrollon prodhimin dhe tregtimin e hashashit të Shqipërisë, kryesisht të zonës së Lazaratit.
Pa dhënë ndonjë fakt konkret, Daily Mirror thekson se me ndërhyrjen e policisë në Lazarat nuk është zhdukur kultivimi i hashashit, por atje tashmë janë militantët e ISIS që drejtojnë mafien lokale në tregtimin e drogës.
E Përditshmja britanike thekson se e gjithë mariuana shkon me avion në Itali e më pas në Britaninë e Madhe, ku financon celulat e lidhura me ISIS.
Ironia e Daily Mirror është se citon një ekspert të spunazhit nga Maqedonia, Dr Vladimir Pivovarov, për të folur për mafian shqiptare.
Dhe maqedonasi e ka përgjigjen në majë të gjuhës: mafia shqiptare është rekrutuar nga ISIS-i për të prodhuar, shpërndarë dhe shitur drogën e Lazaratit, për të financuar buxhetin e lartë të organizatës terroriste që vepron në Siri dhe Irak.
Asnjë fakt dhe asnjë statistikë për akuzat e saj, gazeta britanike bën edhe një llogari të thjeshtë dhe thotë që 4 miliardë stërlina janë të ardhurat që ISIS nxjerr nga shitja e kanabisit të Lazaratit.
Për hir të së vërtetës, edhe ekspertët e policisë europiane që asistojnë forcat e Rendit në Shqipëri, kanë llogaritur se të ardhurat e shitjes së drogës së Lazaratit rreth 4 vjet më parë shkonin 4 miliard euro, por theksonin se shumica e shitjes së drogës shqiptare bëhet në Itali dhe vendet e ulëta. Pastaj, kjo shifër është aq publike sa çdokush mund të luajë me të.
Po nejse, kjo është statistikë për policinë e shtetit, pasi tabloidi britanik shkon edhe në fantazi më të shfrenuara kur përmend Lavdrim Muhaxherin si pjesë e rekrutimit në Lazarat.
Me një fjalë, rroma për toma për ditë diele. Megjithatë i rëndë është fakti se të ashtuquajturit ekspertë nga Maqedonia marrin përsipër të komentojnë ngjarje shqiptare, kur në fakt, ende nuk kanë nxjerrë të vërtetën e masakrës së Kumanovës apo të ashtuquajturin rastin “Monstra” ku shqiptarët me akuza të çala fajësohen dhe ndëshkohen. Këtë duan të bëjnë edhe për Shqipërinë, natyrisht duke i quajtur si ekstremistë…
/tesheshi.com/
