Për viktimat e djeshme në Mynih, e për më tepër, krejt të pafajshme, e vetmja ndjenjë njerëzore që të pushton është keqardhja. Veçse pikëllimi për ta nuk e përligj gojëlëshimin, për të folur si kodra pas bregut. Aq më tepër kur je president, aq më tepër kur e ke mbiemrin Nishani. Dreqi e mori, o merr nishan e qëllo në të, o mos i hyr asaj pune!
Presidenti gjerman duhet të ketë mbetur pa fjalë kur i ka rënë në dorë mesazhi ngushëllues i presidentit tonë, Bujar Nishanit! Pse do të thoni ju? E thjeshtë!
Ja çfarë thotë shefi i policisë së Mynihut, Hubertus Andrae, për vrasësin 18-vjeçar që hapi zjarr në qendrën tregtare: “…Akt klasik nga një i çrregulluar mendërisht…” Për ta përshkruar më tej atë si të fiksuar pas vrasjeve në masë.
Policia gjermane thotë se nuk ka gjetur prova që vrasësi të ketë lidhje me grupe të tilla si ISIS-i. E përforcon këtë vetë ministri i Brendshëm gjerman, Thomas De Maiziere, që deklaron se nuk ka tregues të lidhjes me terrorizmin ndërkombëtar.
Por nuk mendon kështu presidenti ynë. Ja çfarë shkruhet mes të tjerash në mesazhin e tij për homologun gjerman, të publikuar në faqen zyrtare të kreut të shtetit shqiptar, e që mban datën 23 korrik 2016:
“Aktet e djeshme ekstremiste dhe kriminale terroriste në Mynih… më tronditën shumë.”
Duken ta kenë tronditur aq shumë presidentin, sa e ka kthyer gjithçka dhe në shumës, a thua se bëhet fjalë për shumë akte!
Vazhdojnë thagmat:
“I dënoj me forcën më të madhe këto akte të nxitura nga organizata terroriste e që përmes radikalizimit të të rinjve apo njerëzve në dëshpërim, kërkojnë të terrorizojnë qytetarët tanë e të ndjellin frikë e panik në jetën e tyre të përditshme.”
Halucinacion? Ku i dihet! Fakti është që edhe presja e vetme në fjali nuk gjendet në vendin e vet; për të tjerat mos pyet!
Nga ta ketë marrë informacionin ky presidenti ynë, se na i nxori dhe zbuluar organet gjermane të sigurisë?!
Gjermanët u ngushëlluan së paku se nuk bëhej fjalë për akt terrorist, presidenti ynë ngulmon në të kundërtën!
Njëra palë e ka gabim, me gjasë ajo gjermane… se Nishani të këput kur merr nishan…
Kështu është kur flet goja para mendjes! /tesheshi.com/
