Është tashmë gjerësisht i njohur dhe i pranuar fakti se Shqipëria vuan mungesën e medias profesionale, e aq më shumë, etike. Dhe në përkeqësimin e kësaj situate kanë ndihmuar vrullshëm edhe një sërë portalesh online, që shpifjen, abuzimin me të vërtetën dhe manipulimin e lajmit e kanë shndërruar në mision. Siç është bërë e udhës tashmë, të gjithë opinionistët e “spikatur” në Shqipëri kanë portalet e tyre, ku vjellin vrerin e fermentuar prej vitesh. Një ndër to është edhe portali 360gradë.al, i zotëruar nga analisti i atashimeve të shumëfishta dhe shpesh paralele, por që kohët e fundit i rëndon peshorja nga LSI-ja, Artur Zheji.
Një portal i themeluar me të njëjtën mendësi dhe bartës i të njëjtave cene sikurse drejtuesi i tij, për të cilin shumëkush nga miqtë thotë se nuk ia vlen të merresh, si njeri në hall që është. E para për shkak të dashurisë së pakushtëzuar të tij ndaj alkoolit, dhe e dyta për shkak të dorëzimit duarlart përpara një vesi tjetër, bixhozit. Sigurisht që nuk është çudi që njerëz të marrë peng nga vese të tilla të përdoren si mish për top për shpërndarjen dhe amplifikimin e gjithfarësoj shpifjesh dhe çudirash.
Duhet gjithashtu të pranojmë se portali në fjalë ka arritur brenda një kohe të shkurtër të zërë një vend goxha të “lakmueshëm” për sa i përket numri të ndjekësve, ose të ketë një goxha “bereqet klikimesh” nëse huazojmë fjalët e vetë Artur Zhejit. Mirëpo një sipërmarrje serioze, aq më tepër mediatike, nuk mund të funksionojë si bixhoz, e udhëhequr nga ideja për fitime momentale, duke sakrifikuar në anën tjetër çdo lloj norme profesionale, etike dhe morale, sepse, siç populli thotë me zgjuarsi, boja të del shpejt. Dhe për ta ilustruar se boja ka nisur të dalë tashmë, kemi përzgjedhur dy raste nga shumë të tjerë, të cilët po i ilustrojmë më poshtë.
1. Ndërsa të gjitha mediat botërore raportonin mbrëmë për një manifestim opozitar në Turqi në mbështetje të rendit kushtetues dhe kundër grushtit të shtetit, portali i Arturit e pasqyronte ngjarjen si protestë të opozitës kundër qeverisë, për shkak të masave represive të ndërmarra pas grushtit të shtetit. Aq më grotesk ngjan ky lajm nëse mbajmë parasysh se manifestuesve të opozitës iu bashkuan edhe simpatizantët e AKP-së, partisë së presidentit Erdogan.
2. Një tjetër lajm, nëse mund të quhet i tillë, ishte ai sipas të cilit disa media pranë kryeministrit po sulmojnë zv.ndihmëssekretaren Nuland, duke ripublikuar një përgjim të saj të vitit 2014. Në përgjim, në bisedë e sipër me ambasadorin amerikan në Ukrainë, ajo thotë “Të bëfsha Bashkimin Evropian”. Nuk e dimë se për ç’arsye një media e përdorur si vrasëse me pagesë dhe e afërt me LSI-në duhet të riciklojë një lajm të tillë, për më tepër kur koherenca mes titullit dhe përmbajtjes mungon plotësisht, sepse nuk citohet se cila media pranë kryeministrit po e sulmon Nuland-in. Me sa duket, është pikërisht kjo mungesë koherence që i ka detyruar komentuesit që të shpërthejnë në britma, në përmbajtjen e të cilave nuk mungojnë “robt e shpise”.
/tesheshi.com/
