Nëse mediat kryesore shqiptare, ato që i japin tonin informimit dhe formësimit të opinionit publik, do karakterizoheshin nga parimi i përbashkët i dobisë shoqërore, atëherë do kishin një pakt mes tyre për të mos e patur më Sali Berishën si produkt lajmi.
Kjo jo ndëshkim, por si edukim; i Berishës në radhë të parë e të ngjashmëve me të, sidomos atyre që në të ardhmen do u besohet drejtimi i vendit për ndonjë mandat. Berisha në fakt është një cikël i mbyllur; dhe si i tillë kjo duhej reflektuar dhe në media. Atij nuk mund t`i ndalohet të bëjë politikë, që më tepër nga fakti që është deputet; por atij mund t’i jepen mesazhe nëpërmjet medias që pas 13 vitesh pushtet, kontrata e tij me vendin, popullin, ka përfunduar. Kështu ndodh kudo në botë. Politikani quhet i realizuar në karrierën e tij kur pasi merr një mandat për të udhëhequr, jep çfarë ai beson dhe mundet të japë dhe më pas largohet. Prania më pas e tij në media, mund të jetë për arsye krejt të tjera, edhe në qofshin politike, por rrallë, shumë rrallë, dhe për raste tejet specifike.
Më qartë: çfarë dobie shoqërore ka sot një rrëfim i Berishës në media, siç ndodhi të hënën mbrëma në Top Story përballë Sokol Ballës? Çfarë mund t’u japë më Berisha njerëzve, qoftë dhe me fjalën e tij? A mundet ai t’u injektojë më shumë dashuri për vendin, më shumë dëshirë për punë, më shumë ndershmëri, më shumë solidaritet, më shumë moral, më shumë entuziazëm shoqëror, më shumë vizione për të ardhmen? A mund t’u ofrojë ai modelin e tij personal si bartës virtytesh të tilla? Vështirë të mos thuash jo.
Berisha mund të ftohet sot për t’iu përgjigjur shumë pak pyetjeve, të tilla që kurrë nuk ia bëjnë ata gazetarë që e ftojnë në studio:
Për sa qeverise, cila është reforma më e madhe e ndërmarrë ku po i shihen rezultatet konkrete?
Cili sektor shkëlqeu me ty në qeverisje?
Me ty në qeverisje ç’qe ai moral shoqëror që u shfaq apo e karakterizoi shoqërinë?
Kur qeverise, a u bënë shqiptarët më të drejtë, më punëtorë, më respektues ndaj ligjit?
Dhe një që do ishte kryepyetje: a arrite të bësh shtet?
Ne sot Berishës mund t’i themi lehtësisht politikan, por pamundësisht burrë shteti. Dhe ky është handikapi më i madh i njerëzve që kanë drejtuar dhe e po drejtom këtë vend në 25 vjet.
Pra, nuk ka burra shteti dhe shenjat që të ketë nuk po duken asgjëkundi. Dhe kjo është vërtetë dëshpëruese, kur ky vend ëshët shterpë për të nxjerrë burra shteti, ndërsa nxjerr me shumicë burrecër, që gabimisht quhen dhe politikanë. /tesheshi.com/
