Protestat e studentëve janë gjithnjë të mirëpritura. Për faktin e thjeshtë se studentët shihen si një avangardë për të ndryshuar padrejtësitë e një qeverie, shihen si e ardhmja që shtyn përpara, si “gjaku” i një kombi. Në ditët e fundit të gjithë janë njohur me grevën e studentëve të mjekësisë. Një grevë urie bazuar në kërkesën e vetme: njëjtësimin e tarifave mes studentëve të ardhur nga universitetet private të mbyllura me tarifat e studentëve që kanë fituar shkollën e lartë me sistemin meritë-preferencë. Kjo grevë vjen disa muaj pas fillimit të shkollës së lartë, disa muaj pasi kanë pranuar të paguajnë një tarifë më të lartë dhe disa muaj pasi kanë nisur një vit shkollor më të ulët sesa ai që ishin më parë.
Ministrja e Arsimit, Lindita Nikolla, në takimin me studentët u tha thjesht: “Kujtohuni se keni nënshkruar një kontratë dhe se ju nuk keni hyrë në këtë shkollë në bazë të meritës suaj”. E thënë pak më qartë nënkupton se këtyre studentëve nga shteti u është dhënë një mundësi e dytë për të vazhduar shkollën, por nuk mund të trajtohen njësoj si ata që kanë garuar dhe kanë fituar përmes pikëve shkollën e mjekësisë. Faktikisht çdo fakultet vendos vetë për kuotat dhe rregullat e brendshme të tij. Në këto vendime (udhëzime) që merren prej tyre, vendoset edhe pagesa e gjithsecilit varësisht nga kushtet në të cilat një student futet në shkollë. Ka fakultete që u krijojnë mundësinë studentëve të cilët nuk e kanë fituar shkollën përmes konkursit, që ta vazhdojnë atë kundrejt një pagese që është disa herë më e lartë se ajo që paguajnë ata që kanë marrë pikët e duhura.
Dhe kjo është një situatë normale brenda dhe jashtë Shqipërisë. Çdo fakultet vendos kategori të caktuara dhe bazuar në këto kategori, vendos edhe kriteret (ku përfshihet edhe pagesa). Pyetja që ngrihet në grevën e fundit të studentëve, është: Përse studentët u ngritën tani? Nëse studentët do të ngriheshin për faktin që nuk i bëjnë orët e mësimit siç duhet, që pedagogët kanë mbingarkesë dhe nuk u kushtojnë vëmendje, që nuk kanë bibliotekat e duhura, që nuk kanë laboratorë ku të mësojnë, që diplomat e tyre nuk janë ekuivalente me ato jashtë dhe shumë probleme të tjera që ka sot Fakulteti i Mjekësisë, atëherë një grevë e tillë do të vlerësohej. Në momentin që gjithçka kthehet vetëm në çështje parash në mes të asgjësë, atëherë nuk është çudi që janë të shumtë që ngrenë pyetjen: “Janë studentët që po protestojnë për një padrejtësi apo është një parti politike që po përdor studentë të caktuar për qëllimet e veta?” I takon gjithsecilit të bëjë një analizë dhe të kuptojë situatën siç duhet. /tesheshi.com/
