Grabitja e një sasie të madhe valute të enjten në drekë brenda hapsirës së fluturimeve në aeroportin e Rinasit, është e disata për nga lloji, por e para e një shkalle të tillë sipërore guximi të çmendur hajdutesk e kriminal, i cili i hedh në tuç që gjithë “çunat” e Tahirit, apo “policinë e kthyer në detyrë”.
Por ky guxim nuk vjen disido, nuk është dhe nuk është thjesht një delikuencë kriminale e rastësishme; por është një investim që ka si lëndë të parë dhe vetë shtetin, strukturat e tij. Mjaft të thuhet se asnjë prej vjedhjeve të deritanishme të këtij zhanri hollivudian, ku nën tyta armësh merrem thasët plot të bankave gjatë transportit, nuk është zbuluar.
Policia, maksimalisht shkon deri tek automjeti i djegur i autorëve ku më shumë se largimi pa gjurmë i tyre, i shqetëson era e djegur që u ngacmon flegrat e hundëve.
Dhe çështja nuk është aq teknike. Pra, nuk kemi të bëjmë thjesht me struktura që nuk e kanë bërë mirë punën e tyre. Banda që planifikon dhe më pas guxon ta realizojë atë lloj grabitjeje, që në të gjitha rastet rezluton një sukses i vërtetë, ka një motivim psikologjik të fortë për ta bërë këtë gjë, që nuk niset thjesht nga dobësia e strukturave, në kuptimin teknik të fjalës. Ajo sheh tek fronti përballë, shteti, mpakjen, demotivimin, mungesën e çdo kredoje morale në kryerjen e detyrës, dhe kjo i jep revansh.
Sensorët e krimit janë tejet të fuqishëm për të matur klimën e favorshme ose të pafavorshme për një akt, një veprim.
Ta themi troç: Rilindja, edhe në mos pastë përgjegjësi teknike të drejtpërdrejta në këto lloj aktesh të pazakota krimi, ka dështuar të injektojë ndenjën e një shteti që e kap lepurin me qere, me anë të një policie të motivuar.
Maksimalja që ka arritur është një make up në pamjen e uniformave blu, përgjithësisht në metropol, si dhe një angazhim energjish për t’jua bërë jetën ferr drejtuesve të automjeteve me zbatim të pikëpërpiktë të kodit rrugor, i përkthyer më tepër si një aksion për gjoba (vjelje parash për arkën e shtetit), sesa si përpjekje për të edukuar gjindjen me ndenjën e zbatimit të ligjit gjatë drejtimit të automjetit.
Pra, e gjithë pikëpyetja e madhe pas grabitjes së djeshme në Rinas është: pse krimi është kaq i motivuar, derisa edhe për policinë thuhet se është po ashtu e motivuar?!
Ç’i frymëzon ata që grabisin miliona në mes të ditës, pa u bër tërr syri, derisa kryeministri e ka në majë të gjuhës frazën sfiduese “Po bëjmë shtet!”
Dhe kjo vlen edhe për ta gjithë ata që vijojnë t’u qepen çdo ditë malave e kodrave për t’i bërë pjellore si dhe fushat…me kanabis! /tesheshi.com/
