Çdokush që e ndjen veten vërtet të ndershëm; që ka investuar për të mos qenë cipëplasur; që është kujdesuar që emri i tij të përmendet kudo e kurdo për mirë; që atë çka fituar e ka vetëm me nder e djersë…a mund ta paramendojë veten se si do ishte ndjerë nëse ndokush, qoftë dhe Sali Berisha, do e kish bërë rezil në publik për të kundërtën?!
Nuk do ish përmbajtur dot, e do kishte gjetur mënyrën për t’iu përveshur, ku me ndonjë përgënjeshtrim verbal, e ku me ndonjë denoncim për shpifje. Dhe kjo do ishte mëse njerëzore. Pra mjaft ta provojë tek vetja, sigurisht nëse i plotëson kriteret që e bëjnë vërtet të paimplikueshëm në pandershmëri, etike apo ligjore.
Mirëpo Agron Xhafa, njeriu i shënjestruar prej disa ditësh nga PD-ja, i akuzuar si narkotrafikant ndërkombëtar e në kërkim nga autoritetet venezueliane, as që i ndihet zëri. As vëllait të tij me shumë emër në politikë, Fatmir Xhafa, padyshim shkakut kryesor për daljen e tij në skenë.
Ka folur vetëm Edi Rama, me një frazë sipas së cilës Agron Xhafa të ngjan me një zanatçi të rëndomtë, që shkon çdo ditë në punë me bukë me vete nën sqetull.
“Dhe në stilin e tij të vjetër e të neveritshëm bolshevik, ka ngritur një akuzë mbi një histori të sajuar këmbë e krye, për të vëllanë e Fatmirit. Një histori me drogë venezuelane, për babain e dy fëmijëve që është në punën e tij të ndershme dhe ka vetëm një faj:
Eshtë vëllai i njeriut që drejton Komisionin e Posaçëm Parlamentar për reformën më të rëndësishme dhe më të vështirë të 25 vjetëve të fundit!”, shkrojti Rama tre ditë më parë.
“…për babain e dy fëmijëve që është në punën e tij të ndershme…”(!)
Ok që paska dy fëmijë (ndërkohë që mund të kishte dhe më tepër, tre, katër, ose dhe një, ose mund të ishte dhe beqar fare), por cila është puna që bën dhe që për më tepër është e ndershme?! E nëse nuk e thotë Rama, pse nuk del vetë ai, Agroni pra, që ta thotë se ç’punë bën?!
Rama e ka obligim partiak të mbrojë Xhafën Fatmir, si të tijin në punët e qeverisjes, por askënd nga trungu i tij familjar.
Frazën mbrojtëse, Rama e ka vënë në mes të një teksti fshikullues ndaj Sali Berishës, me kryefjalë gojështhurrjen e tij. Dhe kjo është plotësisht e vërtetë. Por po aq e vërtetë është dhe ajo sipas së cilës Berisha jo gjithnjë gabon në shënjestër, ndodh që ia qëllon dhe tejet saktë madje.
Sa për “arsyen opozitare” të goditjes së Fatmir Xhafës nëpërmjet vëllait të tij, edhe sikur mos ekzistonte “vëllai” si prishës imazhi, emri i Fatmir Xhafës nuk i shkon aspak një reforme në drejtësi me nuanca shenjtëruese.
Më shumë se si një jurist i zoti, ai vjen në politikë si një personazhi aktiv i ish-sistemit komunist, një danoç burrë për të ngrënë bukë me anë të partisë. Lexo: Kur Fatmir Xhafa i reformës në drejtësi adhuronte Stalinin: na frymëzon jeta dhe vepra e tij!
Reforma në drejtësi, për të qenë e besueshme në shenjtërinë e promovuar, do i kish dashur ca autorë me biografi më të pastër politike, në mos dhe familjare.
Dhe meqë u përmend “buka” pak më sipër, kjo heshtje e Fatmir Xhafës dhe e të vëllait për t’i përgënjeshtruar akuzat e PD-së, të ngjan me “gojën vetëm për bukë” të personazheve në fjalë! /tesheshi.com/
