Nga Enklid Pelari
Shpërthimi në aeroportin e Stambollit dhe tre shpërthimet e mëparshme në Ankara vijnë pas shpalljes së aleancës së nëntë organizatave të majta me PKK në kuadër të asaj që quhet “Lëvizja e revolucionit popullor”. Konsiderohet se qëllimi i tyre është për të luftuar kundër shtetit turk, e sidomos kundra Partisë për Drejtësi dhe Zhvillim, të cilën ata e përshkruajnë si të rrënuar.
Shpërthimet vijnë vetëm pak kohë pas dislokimit të njëzet mijë trupave turke në Juksik Ufa, provincë e Hakarisë në juglindje të vendit. Ky dislokim ushtarak bëhet në kuadër të përgatitjes për fillimin e operacionit ushtarak në shkallë të gjerë ndaj eksponentëve të anëtarëve të PKK-së. Këto operacione janë të ngjashme me ato të bëra më parë në Silop, në Xhizre dhe në zonat përreth, që kanë synuar anëtarët e PKK-së. Këto operacione bëhen për të prishur projektin e shpallur nga këto rajone për autonomi nën autoritetin e partisë kurde.
Dështimi kurd
Opinionisti i gazetës Sabah, Fahrettin Altun, thotë se ky sulm, i cili ka në shënjestër civilët, reflekton dështimin e përjetuar nga PKK-ja pas strategjisë së tyre për t’u ekspansionuar në Siri dhe pas regresit të sukseseve të arritura në veri.
Gazetari, që është gjithashtu kryetari Qendrës i SITA për Studime, Dega e Stambollit, shton se plani i partisë kurde synonte që këto rajone të shpallnin autonominë, si dhe u bënin thirrje kurdëve të Turqisë që të revoltoheshin kundër sistemit politik atje. Thirrje këto që nuk gjetën jehonë në popull.
Autori thekson se eksponentët e partisë kurde kanë pësuar goditje të dhimbshme nga ana e ushtrisë turke, pasi u vranë qindra prej tyre. Kështu, partia kurde synon që përmes këtij procesi të krijojë një atmosferë terrori dhe paniku në rrugët turke, në mënyrë që të ndikojë në vendimet politike të saj, për rrjedhojë, të ndalojë edhe operacionet ushtarake në juglindje të vendit.
Ndikimi i krizës siriane
Nga ana e saj, drejtoresha e lajmeve në gazetën Yurt (që konsiderohet si opozitare e qeverisë), Dilhun Gindshal, thotë se ajo që përjeton Turqia është pasojë e destabilitetit sirian. Vetëm se ajo, si opozitare që është, bën me faj politikat e jashtme të qeverisë turke dhe gabimet në sigurinë e brendshme.
Gindshal shkon edhe më tej, duke thënë se të gjitha sulmet në Turqi, që nga korriku i viti të kaluar, kanë të njëjtin objektiv, destabilizimin e vendit.
Influenca e Sirisë
Vëzhguesit turq thonë se vazhdimi i krizës siriane do të shkaktojë edhe më shumë përshkallëzime trazirash dhe tensionesh në vend.
Në këtë drejtim, Fahrettin Altun beson se do të jetë e vështirë për Turqinë të gëzojë stabilitet në lagjet e saj, ndërkohë që ka një zjarr flakërues, të quajtur Siri. Por kjo gjë, sipas tij, nuk kërcënon vetëm Turqinë, por Evropën, e cila ka përjetuar edhe më parë dhunë me origjinë sirinë.
Ekspertët e sigurisë turke besojnë se insistimi i Turqisë për ruajtjen e unitetin dhe integritetit të territoreve siriane dhe irakiane është një nga arsyet më të rëndësishme se pse këto organizata e shohin si një armik Ankaranë, që kërcënon ekzistencën e tyre.
Kështu, PKK-ja ngjan më shumë me një bishë që po tërbohet kur merr fund, sesa me një subjekt politik që po njeh zgjerim. Në zgjerim apo rrënim, ajo që mund të thuhet me siguri është se kjo organizatë tashmë i ka plotësuar të gjitha parametrat për t’u kualifikuar si terroriste. /tesheshi.com/
