Ditën e sotme është themeluar Shoqata e Bashkive të Shqipërisë, e cila ka dalë me një deklaratë e rezolutë dhe ka zgjedhur dhe kryetaren e saj: është kryebashkiakja e Shkodrës, Voltana Ademi. Madje, kjo organizatë ka kërkuar që të nisë dekriminalizimi në radhët e të zgjedhurve vendorë.
Vendim i fortë në dukje që normalisht tërhiqte kureshtjen në një ditë e shtunë si kjo e sotme, pa lajme e zhvillime ditore.
Por në fakt në këtë mbledhje morën pjesë vetëm krerët e bashkive të zgjedhura nga Partia Demokratike më 21 qershor që janë 15 vetë plus këshilltarët. Themelimi i Shoqatës së re të Bashkive ishte një bashkim i shoqatës së vjetër që përbëhej nga të zgjedhurit e PD-së dhe Shoqatës së Komunave, e cila ishte më pluraliste, por tani nuk ekziston pasi komunat janë zhdukur.
Para disa ditësh pritet të mblidhet shoqata tjetër paralele, ajo që quhet Shoqata e Autonomisë Vendore, e drejtuar dikur nga Blendi Çuçi, sot ministër Shteti për Pushtetin Vendor dhe, sipas gjasave do të drejtohet nga kreu i Bashkisë së Tiranës, Erion Velia.
Kjo shoqatë do të miratojë një rezolute ndryshe nga ajo e Shoqatës Bashkive me kryetare znj. Ademi, dhe në të sipas gjasave do të marrin pjesë 46 kryetarët e zgjedhur nga PS-LSI, plus këshilltarët respektivë.
Pra, organizatat e pushtetit vendor, në vend që të jenë grupime interesi të të zgjedhurve për të grupuar kërkesat përballë qytetarëve, janë kthyer në “frëngji” partiake shtesë për të sulmuar kundërshtarët politikë të ditës.
Që do të thotë se nuk na mjafton parlamenti, partitë, apo mediat e polarizuara.
Në të gjithë botën, ka një shoqatë bashkish ku janë të grupuar të gjithë, pa asnjë dallim politik, dhe ku kryetari zgjidhet me konsensus sipas disa kritereve apolitike, pa shkaktuar asnjë ngërç mes palëve kundërshtare.
Në vitin 2002 u tentua një organizim i tillë pluralisht dhe për herë të parë në Shkodër u mblodhën Edi Rama i PS-së së bashku me Ormir Rusin e PD-së, por që të nesërmen u prish nga urdhëri partiak.
Urdhër që vendos gjithçka, që nga deklaratat, veshjet, buzëqeshjet apo dhe frymën sa herë duhet ta nxjerrë folësi para mikrofonit në podium…
/tesheshi.com/
