Një lëvizje e papritur ka ndodhur në Partinë Demokratike pas mbledhjes së ambasadorëve në selinë blu. Debatet, bojkoti dhe mesazhet e koduara nga të dyja palët kanë prodhuar dhe “viktimat” e para.
Kështu, mbrëmë në darkë u lajmërua dorëheqja e ish-ministrit të Drejtësisë, Eduard Halimi, nga Komisioni i Reformës në Drejtësi dhe emërimi i ish-ministrit të Mbrojtjes, Arben Imami, në këtë komision pikërisht pasi Halimi kishte ngritur kartonin jeshil për ta miratuar në parim draftin e përgatitur nga amerikanët dhe Bashkimi Europian.
Çfarë përfaqëson kjo lëvizje e papritur? Një manovër “luftarake” duket si fillim, dhe jo thjesht për metaforë të rokadës. Pra, u largua ish-ministri i Drejtësisë, që përfaqëson ekspertin jurist, për t’u zëvendësuar me ish-ministrin e Mbrojtjes, që përfaqëson aspektin militar.
Ajo që mësohet nga burime pranë Partisë Demokratike është se ka qenë ndërhyrja energjike e ish-kryeministrit Sali Berisha për t’i zëvendësuar njerëzit në Komision. Selia blu ka shpërndarë në mënyrë jozyrtare dy versione të kësaj manovre politike: njëri që të jetë Arben Imami zëvendësuesi i Halimit, e tjetri që të jetë Oerd Bylykbashi.
Të dy deputetët e Partisë Demokratike kanë një gjë të përbashkët: që të dy kanë shërbyer si shefa kabineti të Sali Berishës në kohëra të ndryshme, Imami në mandatin e parë, 2005-2009, dhe Bylykbashi në mandatin e dytë.
Që do të thotë se janë njerëzit e besuar të doktorit, i cili, pasi i bojkotoi në mënyrë demonstrative ambasadorët në mbledhjen e djeshme, imponoi një zgjidhje të shpejtë, duke e pështjelluar situatën.
Eduard Halimi ka krijuar gjatë kësaj kohe një raport të afërt në Komisionin e Reformës me pjesëtarët e tij, sidomos me krerët e EURALIUS-it dhe OBDAT-it, duke bërë të mundur edhe futjen e nenit 25, që parashikonte një lloj amnistie për ish-ministrat.
Berisha e ka shfrytëzuar gjithsesi këtë manovër në mënyrë mjeshtërore. Pasi Arben Imami ka qenë ministër i Drejtësisë në kohën e qeverisjeve të PS-së dhe bashkëkryetar i hartimit të Kushtetutës së vitit 1998, e cila është në fuqi sot e kësaj dite. Pra, as më pak e as më shumë, Imami është një nga “baballarët” e ligjit themeltar të shtetit, njësoj me ata që formuluan Kushtetutën e Amerikës.
Por Imami ka një pozicion disi të debatueshëm në këtë proces: ndaj tij ka pasur mbi disa padi në Prokurori për kohën që ka qenë Ministër i Mbrojtjes. Ai është një nga dëshmitarët e rëndësishëm për çështjen e Gërdecit, por, nga ana tjetër, ditët e fundit ka kundërshtuar fuqishëm praninë e ambasadorëve të SHBA-ve dhe BE-së në grupin parlamentar të Partisë Demokratike.
Me një fjalë, kemi të bëjmë me një “rebelim” të ish-ministrave ndaj Lulzim Bashës, të cilët treguan se kanë pushtet më shumë se ç’mendohej në Partinë Demokratike.
Tani pritet kundërpërgjigja e dy protagonistëve: ambasadorëve Donald Lu dhe Romana Vllahutin, që, sipas burimeve diplomatike, nuk do të zhvillojnë më asnjë takim politik, por vetëm do të jenë të pranishëm në Parlament për të shpejtuar votimin e reformës.
Seanca e sotme plenare e Kuvendit është dhe “letra e parë e lakmusit”. /tesheshi.com/
