Kandidati demokrat për Bashkinë e Dibrës, Sherefedin Shehu, përgjatë fushatës së tij elektorale ka potencuar një lloj premtimi, ndër më të konsumuarit, më të lehtët për t’u dhënë, dhe padyshim ndër më populistët: atë për ulje taksash sapo të marrë drejtimin e bashkisë.
Dhe përgjithësisht, i gjithë vizioni e PD-së me të cilin e rikërkon pushtetin ka mbetur deri tek ulja e taksave, ndërkohë që kriza shqiptare është aq e thellë, aq e gjithanshme, aq komplekse, sa taksat, sado që të ulen, nuk e zgjidhin kolapsin e pazakontë të saj, i cili sigurisht nuk është vetëm ekonomik. E sigurisht që nuk është dhe vetëm “krizë urbanistike”, sa të mendosh se me “rilindjen urbane” të qyteteve, Shqipëria nis e futet në udhë të mbarë.
Ato janë arnime, por jo operacione të thella të shtrira në kohë të cilat ngërthejnë sektorë kombëtare e lokalë, ekonomikë e sociale, kulturore e shpirtërore, arsimorë dhe edukues, për të bërë të mundur krjimin e një shije normale të jetës në Shqipëri, kudoqoftë, e cila pothuajse është bërë e pajetueshme.
Qytetet shqiptare e zona të tjera banimi nga jugu ne veri, kanë nevojë më së pari që t`u përcaktosh arsyen se përse ekzistojnë, përse duhen ekzistuar, në bazë të burimeve, resurseve e specifikave të natyrave të ndryshme, të cilat i bëjnë të motivueshme për të jetuar.
Peshkopia apo qytetete të tjera të vendit, nuk janë katandisur në fjetina të rëndomta thjesht nga taksat e larta, porse prej vitesh politika nuk ka arritur t`i rikapitalizojë, t’i rifortmatojë në kompleks në kushtet e një ekonomie tregu, duke i lënë të katandisen në djerrina sociale të frikshme, ku njerëz me shije minimale jete, a padyshim me dy pare mend në kokë, vështirë se do zgjidhinin të jetonin aty.
Sakaq, për rastin konkret, ka vetëm një vit që Peshkopia u doli prej duarsh demokratëve, të cilët e qeverisën për tre mandate rresht, si rrallë ndonjë qytet këto vitet e fundit, përjashto bastionet e njohura si nga e majta e si nga e djathta.
Dhe do ishte normale që kandidati Shehu, meqë në këtë fushatë e ka në krah dhe ish-kryebashkiakun Krosi, t’u ofronte për kujtesë dibranëve modelin e lënë prej këtij të fundit. Nëse ai vërtet ka punuar mirë e ka lënë një model të prekshëm, atëherë fushata bëhet dhe më e thjeshtë, pa qenë nevoja për t’u konsumuar aq rëndomësisht me teza populiste gjithë ai kapacitet në fushën e financave, siç është pra Shehu.
Pra, mjaft t’u thuhet: “ja si e qeverisi PD-ja Peshkopinë në tre mandate, ja se ç’qytet la, si e rregulloi atë, si e përmisoi jetën e atyshme, si i dha një kuptim, një frymë, një vizion…e që në bazë të kësaj e duam sërish, tashmë edhe Dibrën në tërësi, për ta zgjeruar akoma dhe më shumë këtë mirësi që ia lamë…”
Në rastin e PD-së, kjo duhet të jetë e vetmja gjuhë e fushatës. Por siduket nuk është dhe nuk mund të jetë, derisa gjithçka nis e mbaron, shkon e tretet tek premtimi për taksa të ulëta…./tesheshi.com/
