Nga Bujar M. Hoxha
Vetëm pak ditë pasi golat e Cristiano Ronaldo-s ndaj Juventusit i kishin dhënë një tjetër trofe të Champions League-s Realit të Madridit në nisje të qershorit, portugezi kërcënonte të largohej.Bota e futbollit do të tronditej ende pa marrë vrull fushata verore e transferimeve.
Zhurma për largimin e mundshëm të Ronaldo-s nga Reali do të fashitej me kalimin e kohës, do të rikthehej rishtas, por asgjë nuk do ta pengonte atë ta pushtonte “Camp Nou”-n në El Clasico-n e parë zyrtare të sezonit të ri.
Vetëm 24 minuta, por vetëm 24 minuta, do të mjaftonin për 32-vjeçarin për të bërë gjithçka në të parën finale të Superkupës së Spanjës, të luajtur në orët e fundit të së dielës së 13 gushtit.
Askush si ai! Fundamental për Realin!
Ronaldo do të hynte në lojë në minutën e 58-të, duke zëvendësuar Benzema-në. Ndërsa protagonistë do të ishin për shumë momente vendasit, me Pique-nëqë do të shënonte një autogol, me Messi-n që do të tundte rrjetën nga pika e 11-metërshit pas një simulimi të Suarez-it të shpërblyer gabueshëm nga gjyqtari, do të vinte dhe çasti për portugezin.
Katalizator, shpërthyes, shënues…
“Camp Nou” hesht në minutën e 80-të, atëherë kur Cristiano Ronaldo godet mjeshtërisht nga larg në portën e katalanasve. Një gol i shoqëruar me një karton të verdhë. Muskujt e treguar publikut, sfida ndaj 90.000 tifozëve, e ka një çmim.
Dy minuta më vonë, një fërkim po nga ai me Umtiti-në hyrje të zonës së Barcelonës. Rrëzimi në tokë i Ronaldo-s, i çmuar si jo i njëmendtë nga gjyqtari, merr si përgjigje një tjetër karton të verdhë, të kthyer kësisoj në të kuq.
Këtu mbarojnë 24 minutat në fushë të Ronaldo-s, me veprim final një shtyrje nga pas të arbitruesit të lojës.
Pa të në fushë, Reali godet përsëri për inerci, këtë herë me një perlë të Marco Asensio-s. Të mërkurën do të ketë një El Clasico të dytë të finales së Superkupës; fitorja 1-3 e Realit në të parën sugjeron vazhdimin e një cikli fitues.
Ndryshe nga ç’ngjet me Barcelonën. Mungesa e brazilianit Neymar ishte lehtësisht e spikatshme në finalen e së dielës. Shuma e jashtëzakonshme e parave mund të ketë mbushur arkën e klubit, por ka lënë një gropë të madhe në fushë.
Për ironi të fatit, Neymar do të shënonte mbrëmë, veçse me bluzën e PSG-së, në të parin takim të aktivizuar për skuadrën e kryeqytetit francez. Argëtim, buzëqeshje, gol, pasim për gol. Neymar ngjan mjaft i lumtur në destinacionin e ri.
Kohët e Pep Guardiola-s, që fitonte 14 trofe nga 19 të mundshëm në katër vitet e qëndrimit të tij në krye të Barcelonës, duken të largëta, ashtu siç duken tani dhe ato të Luis Enrique-s, me nëntë trofe të fituar nga 13 të mundshëm në tre sezone. I porsaardhur, tekniku Ernesto Valverde ka malore përpara. Një detyrë që bëhet akoma më e vështirë për të për aq kohë sa rivali i përjetshëm i Barcelonës në futbollin spanjoll do të ketë në gjirin e vet një shpërthyes si Ronaldo!
El Clasico-ja e së dielës e vërtetoi katërçipërisht këtë, me vetëm 24 minuta në fushë për portugezin. /tesheshi.com/
