Tre kryeministrat, Vuçiç, Rama e Zaev, patën një telefonatë mes tyre në lidhje me atë çfarë i ka bërë bashkë kohët e fundit, idenë e një “mini-Shengeni” ballkanik, ku pas një takimi në Novi Sad pak javë më parë, të tre presin të avancojnë me një takim të radhës në Ohër.
Ka qenë Vuçiç ai që postoi një foto me homologët e tij në profilin e instagramit të “futureSerbia”, me mesazhin: “Bisedë e shkëlqyeshme me Ramën dhe Zaevin përpara samitit të rëndësishëm në Ohër në 9 nëntor”.
Një muaj më parë u ra dakord në Novi Sad që bisedimet për heqjen e pengesave për rrjedhën e lirë të mallrave, shërbimeve, kapitalit dhe njerëzve duhet të vazhdojnë në Ohër, ku pritet të paraqiten hapa konkrete.
Ideja e një “Shengeni të vogël” në të cilin do të përfshiheshin vendet e Ballkanit Perëndimor ka ngjallur mendime të ndara në rajon. Skeptikët, dhe me së shumti në Tiranë e Prishtinë, shohin në të një komplot, thënë ndryshe një “Jugosllavi të katërt”. E duke qenë se pikëpyetja më e madhe rreth idesë se tre kryeministrave mbetet pozita e Kosovës, qëndrimi i Tiranës zyrtarë është se pa Kosovën, ky “Shengen” rajonal nuk vlen.
Ministri i Jashtëm në detyrë Gent Cakaj, tha se Shqipëria do të tërhiqet nga nisma nëse Kosova nuk do të aderonte në të.
Takimi i Ohrit, pritet të jetë dhe qartësimi i pozicionit të Kosovës në këtë marrëveshje.
Kryeministri në pritje Albin Kurti, tha se ajo i duket më shumë një ide sesa një projekt, e për të cilin duhet të ishte më i informuar para se të mbajë një qëndrim. /tesheshi.com/
